МТС непрыкметна спісвае грошы з SIM-карт

Абаненты, якія не сочаць за зменамі ў тарыфікацыі, могуць заплаціць за паслугу ў разы больш, чым разлічваюць.

З 1 студзеня паслуга «4G Безліміт» ад МТС не працуе. Абаненты, якія ёй карысталіся, аўтаматычна перайшлі на сістэму тарыфікацыі «Адкрыты інтэрнэт», дзе плата залежыць ад колькасці выдаткаваных гігабайт. Праўда, тыя, хто не заўважыў змяненняў, вымушаныя заплаціць у разы больш, чым разлічвалі, піша tut.by.

Паслуга «4G Безліміт» дазваляла выкарыстоўваць неабмежаваную колькасць трафіку ў сетцы LTE. Каштавала яна 10 капеек на дзень, або прыкладна 3 рублі на месяц. Прапанова ўпершыню з'явілася ў снежні 2015 года і была закрытая з надыходам 2017 г.

Мянчук Аляксандр выкарыстаў SIM-карту з паслугай «4G Безліміт» у роўтэры. Навін аб закрыцці паслугі ён не заўважыў, а SMS ад аператара папросту не ўбачыў — роўтэр не дае магчымасці чытаць паведамленні. У выніку за першыя дні студзеня патраціў больш за 60 Гб інтэрнэт-трафіку.

— І вось з 1 студзеня МТС уводзіць на гэтыя SIM-карты новыя тарыфы [з аплатай] па трафіку. Напрыклад, я з 1 да 8 студзеня трапіў на 100 рублёў, — распавёў ён. — З усіх кліентаў і сяброў, хто на нашу рэкамендацыю падключыў «4G Безліміт», ніхто дагэтуль нічога не ведае. Але пры ўваходзе ў асабісты кабінет ужо бачаць — «налічана 100 рублёў».

Аляксандр мяркуе, што аператар не павінен быў дапусціць спісання такіх вялікіх сум. Прадстаўніца МТС патлумачыла, што кампанія дзейнічала згодна з законам.

Згодна з Правіламі надання паслуг электрасувязі, аператар можа паведаміць абаненту аб зменах ў тарыфах праз СМІ, інтэрнэт, свой сайт або SMS-паведамленне. Аператар абавязаны зрабіць гэта не пазней чым за 10 дзён да ўнясення змяненняў.

«22 снежня 2016 года кампаніяй МТС было праведзена належнае інфармаванне абанентаў, — растлумачылі ў прэс-службе кампаніі. — Інфармацыя аб спыненні паслугі была апублікаваная на афіцыйным сайце аператара, была распаўсюджаная ў шматлікіх СМІ (публікацыі былі атрыманы больш чым у 50 выданнях і інтэрнэт-пляцоўках) і дадаткова кожнаму карыстальніку паслугі «4G Безліміт» было адпраўленае асабістае SMS-апавяшчэнне. Таму з пункту гледжання выканання дамоўных абавязанняў перад кліентам кампанія МТС зрабіла належнае інфармаванне».