Магчымы аўтар кампрамату на Трампа кінуўся на ўцёкі

Прэзідэнт ЗША назваў інфармацыю пра кампрамат на яго фальшыўкай.

Былы супрацоўнік брытанскай выведкі Крыстафер Стыл, якога ўважаюць за аўтара апублікаванага нядаўна дакумента пра нібыта наяўны ў Расеі кампрамат на абранага прэзідэнта ЗША Дональда Трампа, з'ехаў са свайго дома ў аўторак або ў сераду, яшчэ да таго, як ягонае імя з'явілася ў прэсе. Пра гэта паведамляе ВВС.

Перад ад'ездам ён папрасіў суседзяў прыгледзець за ягонымі коткамі.

Карэспандэнт агенцтва Пол Вуд сцвярджае, што Стыл баяўся за сваё жыццё яшчэ ў кастрычніку мінулага года. Тады ж Вуд упершыню ўбачыў дакумент, аўтарства якога прыпісваюць Стылу, і заўважыў у ім істотныя недакладнасці.

10 студзеня 2017 года анлайн-выданне BuzzFeed апублікавала непацверджаны дакладнымі крыніцамі «дакумент», які нібыта быў перададзены Трампу амерыканскай выведкай ЗША. У яго тэксце гаворыцца, што ў РФ «ёсць кампрамат» самага рознага плана на 45-га амерыканскага прэзідэнта.

У Трампа адмаўляюць атрыманне такога «дакладу» і адхрышчваюцца ад інфармацыі аб тым, што спецслужбы РФ збіралі для яго інсайд, а сам ён у сацсетцы напісаў, што «гэта фальшывыя навіны - сапраўднае паляванне на ведзьмаў».