Жыхар Ганцавічаў вынес з храма ахвяраванні і царкоўнае віно

Зламыснік прабраўся ўнутр царквы праз сутарэннае акно, разабраўшы пры гэтым цэглу.

Беспрацоўны раней судзімы 39-гадовы жыхар Ганцавічаў затрыманы за ўчынены ў сельскім храме крадзеж, паведаміў БелТА першы намеснік начальніка Ганцавіцкага РАУС Аляксей Крысюк.

Зламыснік быў затрыманы супрацоўнікамі міліцыі па гарачых слядах і змешчаны ў ізалятар часовага ўтрымання. Цяпер прымаецца пастанова аб прыцягненні мужчыны да адміністрацыйнай адказнасці паводле арт. 10.5 КоАП (дробны крадзеж). Санкцыя артыкула прадугледжвае штраф сумаю ад дзесяці да трыццаці базавых велічынь або адміністрацыйны арышт.

Інцыдэнт адбыўся ў ноч з 12 на 13 студзеня ў вёсцы Агарэвічы. Сляды ўзлому ў храме Святога Роўнаапостальнага князя Уладзіміра выявіў яго настаяцель іерэй Аляксандр Лемяза.

Зламыснік прабраўся ўнутр царквы праз сутарэннае акно, разабраўшы пры гэтым цэглу. Злодзей пакінуў пасля сябе сляды не толькі на снезе, але і ўнутры храма: на падлозе валяліся пабітыя і цэлыя бутэлькі з кагорам, ускрытая царкоўная каса і скарбонка для ахвяраванняў вернікаў.

Са слоў настаяцеля, усяго злодзей выкраў блізу Br150 і 4 бутэлькі віна, а таксама араматызатар для абразоў і пасведчанне аб шлюбе. Частка выкрадзенага супрацоўнікі міліцыі канфіскавалі ў зламысніка пры затрыманні. Як патлумачыў сам затрыманы, напярэдадні ён выпіў і адправіўся за дабаўкай. Сродкаў для працягу бяседы у яго не было, таму замест крамы ён забраўся ў царкву.

Як раней паведамляў сайт charter97.org у Гомелі жанчына забрала з ГЦ скрыню з ахвяраваннямі на лячэнне дзіцяці.