Сёння беларусы могуць назіраць наймагутнейшы зарапад
2- 3.01.2017, 12:08
- 25,233
Уначы з 3 на 4 студзеня зямляне змогуць убачыць метэарытны паток да 120 метэораў у гадзіну.
На пачатку 2017 года дасягне свайго піку метэорны паток Квадрантыды. Уначы з 3 на 4 студзеня зямляне змогуць убачыць ад 60 да 120 метэораў у гадзіну. Аб гэтым паведамляе space.com.
Метэорны паток можна назіраць з 28 снежня да 7 студзеня. Пік квадрантыд прыпадзе на 4 студзеня а 14-й гадзіне паводле менскага часу. У гэты момант над Зямлёй будзе праносіцца да 120 метэораў у гадзіну (паводле звестак РІА «Новости» — блізу 100).
Лепш за ўсё знічкі будуць бачныя жыхарам Заходняга паўшар'я, дзе ў момант піка патоку будзе ноч. Аднак у жыхароў іншых рэгіёнаў Зямлі — у тым ліку і беларусаў — таксама ёсць шанец убачыць асобныя метэоры пры ўмове яснага надвор'я.
Квадрантыды — «павольныя» метэоры, іх хуткасць адносна Зямлі складае блізу 41 км/с. Радыянт патоку размешчаны недалёка ад полюса свету, паміж сузор'ямі Дракона і Валапаса. Група зорак, што знаходзіцца на ўсход ад ручкі Вялікай Мядзведзіцы, аб'ядноўвалася раней у сузор'е Сценнага Квадранта, адкуль і пайшла назва.
Метэорны паток звязаны з астэроідам 2003 EH1, які, як мяркуецца, з'яўляецца астаткам каметы. Квадрантыды ўважаюцца адным з найбольш вядомых і буйных метэорных патокаў. У адным шэрагу з ім стаяць Гемініды, Персеіды, Леаніды, Арыяніды і Лірыды.