Аляксандр Глеб: Стаць бацькам у 35 гадоў? Гэта крута

Беларускі паўабаронца падзяліўся ўражаннямі ад нараджэння дачкі.

- Аляксандр, як гэта — стаць бацькам у 35 гадоў?

- Гэта крута. Я да гэтага доўга ішоў, марыў пра гэта. Разумеў, што і бацькі хочуць унукаў. Але яны ніколі на мяне не ціснулі, не падштурхоўвалі. Тата і мама наогул з разуменнем ставіліся да рашэнняў, якія я прымаў у сваім жыцці.

Задумвацца пра дзіця я пачаў ужо пасля 30. На мяне, вядома, вельмі моцна паўплывала Заходняя Еўропа, дзе многія спачатку будуюць асабістае жыццё, жывуць для сябе, працуюць, а ўжо потым думаюць аб дзецях. Для гэтага я павінен быў сустрэць патрэбнага чалавека. І мне пашанцавала. Я пазнаёміўся са Светай, якую люблю, з якой шчаслівы. Яна зрабіла мне галоўны падарунак у маім жыцці. Ведаеш, ад таго, што адбылося, адчуваю проста неверагодныя эмоцыі. Складана іх нават выказаць. Хочацца цяпер нейкага спакою. Раней мог у клуб схадзіць, патанчыць, а цяпер мне трэба зусім іншае: дом, сям'я, утульнасць, - распавёў Аляксандр Глеб у інтэрв'ю by.tribuna.com.

- Пасля 27 снежня ваша жыццё змянілася кардынальна?

- Лад жыцця змяніўся, але не моцна. Проста да нас у дом прыйшоў родны і светлы чалавечак. Сябры кажуць, што адчуванні стануць яшчэ мацнейшыя, калі дачка пачне поўзаць, пазнаваць нас, усміхацца, але мне і цяпер добра. Атрымліваю задавальненне ад кожнага пражытага дня. Увесь час імкнуся праводзіць дома з жонкай і Сашанькай.

Новы год адзначылі ў гэты раз досыць сціпла. Я раней мог пагуляць з кампаніяй, а цяпер 31 снежня а 20:00 сабраліся з бацькамі, надалі ўвагу дачцэ, пасядзелі за сталом, трохі прыгубілі (без удзелу Светы) за здароўе Сашанькі, і ўжо а трэцяй гадзіне я лёг спаць. Сябрам, вядома, даводзіцца адмаўляць, але Саша Глеб як быў простым вясёлым хлопцам, так ім і застаўся. Унутрана я не змяніўся. Проста нараджэнне дачкі зрабіла мяне больш адказным.