Спявачка Мерыем Герасіменкам выпусціла першую песню пасля ад'езду з Беларусі

Трэк пад назвай "Вакол цішыня" быў напісаны на "каленцы".

Спявачка Мерыем Герасіменка, прысуджаная да трох гадоў "хатняй хіміі", выпусціла першую песню пасля эвакуацыі з Беларусі.

У сваім Instagram выканаўца распавяла, што трэк пад назвай "Вакол цішыня" быў напісаны на "каленцы", яшчэ калі яна знаходзілася ў СІЗА.

"Музыка была проста ў маёй галаве, і я апісвала навакольныя падзеі, моманты, свае перажыванні…" — напісала спявачка.

У сінгле Мэрыем падзялілася перажытым досведам, расказала пра жыццё, падзеленае на “да і пасля”, пра неба, на якое даводзілася глядзець “праз белыя вокны, замкнутыя чорнымі кратамі”.

“Гэты трэк для тых, хто гатовы проста занурыцца ў тую атмасферу, паслухаць маю гісторыю, у якой я правяла амаль паўгода, і не толькі я. Ён павінен быў выйсці яшчэ мінулай вясной, але яго час прыйшоў толькі зараз. Сіл усім, для каго гэтая гісторыя будзе асабістай… Гэтым трэкам я заканчваю для сябе тыя ўспаміны”, - напісала Мэрыем.

Нагадаем, Мэрыем Герасіменкам затрымалі ў пачатку жніўня 2022 года пасля таго, як яна сыграла канцэрт на тэрасе бара “Банки-бутылки” ў цэнтры Менска, на вуліцы Зыбіцкай. Сярод іншых яна выканала песні ўкраінскага гурта “Акіян Эльзы”. Дзяўчыну асудзілі спачатку на 15 дзён, потым яшчэ раз на той самы тэрмін, але на волю яна так і не выйшла.

Пазней у дачыненні да Герасіменкі была ўзбуджаная крымінальная справа. Раней сілавікі сцвярджалі, што ў 2020 годзе дзяўчына ўдзельнічала ў акцыях пратэсту. Праваабаронцы прызналі яе палітычнай зняволенай.

20 студзеня 2023 года суд прысудзіў Мерыем Герасіменку да трох гадоў “хатняй хіміі”.

16 студзеня 2024 года стала вядома, што спявачка была паспяхова эвакуаваная з Беларусі і знаходзіцца ў бяспецы.