Памёр заснавальнік Boney M і аўтар хіта Rasputin Фрэнк Фарыян

Ён памёр ва ўзросце 82 гадоў.

Ва ўзросце 82 гадоў памёр вядомы нямецкі музычны прадусар Фрэнк Фарыян. Пра гэта піша Daily Mail са спасылкай на прадстаўнікоў Фарыяна.

Паведамляецца, што Фарыян памёр у сваім доме ў Маямі. Два гады таму яму зрабілі аперацыю – паставілі сардэчны клапан.

Фрэнк Фарыян (сапраўднае імя Франц Ройтэр) быў адным з самых паспяховых музычных прадусараў свету. Ён супрацоўнічаў з такімі зоркамі сусветнай поп-рок-сцэны, як Meat Loaf, Stevie Wonder і многімі іншымі. Сусветную вядомасць атрымаў пасля заснавання Boney M у 1970-я гады. Для гурта ён напісаў такія хіты, як Daddy Cool, Rasputin і Brown Girl in the Ring.

Фарыян атрымаў прэстыжныя ўзнагароды за выдатныя дасягненні ў музычнай індустрыі, у тым ліку тры American Music Award, нямецкі аналаг Grammy – Echo, некалькі ўзнагародаў Goldene Europa, брытанскія Carl Alan Award, Brit Award і інш.

У інтэрв'ю нямецкаму інфармацыйнаму агенцтву DPA Фарыян неяк прызнаўся, што поспех для яго стаў вялізнай нечаканкай і спачатку ён не верыў, што зможа дасягнуць яго.