У Гомельскай вобласці «выміраюць» усе раёны

Ці захаваў Гомель статус горада-паўмільённіка?

Праўладны Белстат расказаў аб колькасці насельніцтва рэгіёнаў Беларусі. У Гомельскай вобласці «выміраюць» усе раёны, адзначае «Флагшток».

Цяперашняе вымярэнне колькасці насельніцтва Белстата ўжо пятае пасля правядзення перапісу насельніцтва ў 2019 годзе. І кожны раз статыстычнае ведамства канстатуе паступовае выміранне Гомельскай вобласці. За 2023 год насельніцтва Гомельскай вобласці скарацілася на 8852 чалавекі.

На 1 студзеня 2024 года ў Гомельскай вобласці пражывала 1 338 671 чалавек. За апошнія пяць гадоў насельніцтва скарацілася на 3,5%. Слабым суцяшэннем можа служыць паступовае скарачэнне тэмпу вымірання. За апошні год ён склаў усяго 0,7%.

Трэці раз за апошнюю пяцігодку скарачэнне насельніцтва назіраецца ва ўсіх раёнах Гомельскай вобласці.

Найбольш моцнае скарачэнне колькасці насельніцтва зафіксаванае ў Ельскім і Кастрычніцкім раёнах: -2,4%. У абсалютным вылічэнні другі год запар антырэкардсмэнам з'яўляецца Светлагорскі раён. У 2023 годзе змяншэнне насельніцтва тут склала 948 чалавек.

Гомель фармальна здолеў захаваць статус горада-паўмільённіка. Колькасць насельніцтва Гомеля за 2023 год скарацілася на 790 жыхароў і склала 501 012 чалавек. У адносным вылічэнні спад насельніцтва ў абласным цэнтры апынуўся найменшым - усяго 0,2%.

Нягледзячы на адносна малыя тэмпы скарачэння колькасці насельніцтва абласнога цэнтра, агульнай залежнасці паміж змяншэннем насельніцтва і урбанізацыяй не назіраецца. З усіх гарадоў прырост жыхароў зафіксаваны толькі ў Нароўлі (+19 чалавек) і Чачэрску (+42 чалавекі), якія з'яўляюцца аднымі з найменшых райцэнтраў Гомельскай вобласці.

Пададзеныя Белстатам звесткі не ўлічваюць грамадзян, якія пераехалі з рэгіёну ў іншыя краіны пасля перапісу 2019 года і не апавясцілі аб гэтым органы ўліку.