Чэмпіён свету 1994 года аднавіў футбольную кар'еру ў 58 гадоў

Каб згуляць з сынам.

Чэмпіён свету 1994 года ў складзе нацыянальнай каманды Бразіліі 58-гадовы Рамарыё зарэгістраваў сябе ў якасці гульца клуба «Амерыка» (Рыа-дэ-Жанэйра), прэзідэнтам якога ён з'яўляецца. Аб гэтым піша ESPN.

Былы нападнік правёў апошні афіцыйны матч у кар'еры ў 2009-м за «Амерыку», улюбёны клуб свайго бацькі. У тым жа годзе ён стаў прэзідэнтам клуба, у 2010-м яго абралі ў ніжнюю палату нацыянальнага кангрэса, а ў 2014-м - сенатарам.

Яго сын, 30-гадовы форвард Рамарыньё, нядаўна перайшоў у «Амерыку».

Рамарыё заявіў, што не плануе паўнавартасна ўдзельнічаць у чэмпіянаце (другі дывізіён штата Карыёка), а «лепш правядзе некалькі матчаў за каманду свайго сэрца і ажыццявіць яшчэ адну мару, гуляючы разам са сваім сынам».

Рамарыё быў прызнаны найлепшым гульцом пераможнага ЧС-1994 і ў тым жа годзе - найлепшым футбалістам года паводле версіі ФІФА. На яго рахунку таксама Кубак канфедэрацый (1997), два Кубкі Амерыкі (1989, 1997) і срэбра Алімпіяды-1988, дзе ён стаў найлепшым бамбардзірам. Усяго ён адыграў за асноўную нацыянальную каманду 71 матч і забіў 55 галоў, а на Алімпіядзе забіў сем галоў у шасці гульнях.

На клубным узроўні Рамарыё запомніўся выступамі за «Васко да Гама», ПСВ і «Барселону».