У Воршы пенсіянерка паверыла, што тэлефануе ейная ўнучка, і аддала ашуканцам буйную суму

Частку грошай паспелі заблакаваць.

У Воршы супрацоўнікі міліцыі затрымалі кур'ера тэлефонных ашуканцаў, паведамілі ў прэс-службе МУС.

У міліцыю звярнулася 83-гадовая мясцовая жыхарка. Пенсіянерка расказала, што ёй пад выглядам унучкі патэлефанавала жанчына і паведаміла, што ўчыніла ДТЗ. За непрыцягненне да крымінальнай адказнасці яна папрасіла перадаць кур'еру блізу васьмі тысяч рублёў.

Супрацоўнікі міліцыі ўстанавілі асобу кур'ера і затрымалі яго. Ім быў 22-гадовы беспрацоўны мясцовы жыхар, які знайшоў падпрацоўку ў мэсэнджэры. Выкрадзеныя сродкі хлопец паспеў пералічыць на пазначаны куратарам рахунак.

«Аднак дзякуючы своечасоваму звароту пацярпелай у міліцыю і магчымасці праваахоўнікаў з'явіцца магчымасці прыпыняць падазроныя аперацыі частку грошай паспелі заблакаваць. У далейшым іх вернуць законнай уладальніцы», - распавялі ў МУС.

Следчыя распачалі крымінальную справу за махлярства.