BILD знайшла ў прарасейскага дэпутата з Нямеччыны бізнэс у Беларусі
8- 19.04.2024, 18:23
- 8,156
Цяпер яму пагражае штраф.
Дэпутат зямельнага парламента Саксоніі ад праварадыкальнай «Альтэрнатывы для Германіі» («АдГ») Ёрг Дарнау з 2020 года зарэгістраваны як уладальнік сельскагаспадарчага бізнэсу ў Беларусі. Яго прадпрыемства можна знайсці ў Адзіным дзяржаўным рэестры Беларусі пад назвай ТАА «Цыбулька Бел», піша нямецкая газета Bild.
Кампанія Дарнау апрацоўвае некалькі сотняў гектараў у Лідскім раёне Гарадзенскай вобласці, які знаходзіцца побач з літоўскай і польскай мяжой. «Цыбулька Бел», акрамя гародніны, вырошчвае таксама бахчавыя культуры і караняплоды.
Весці такі бізнэс дэпутатам паводле законаў Нямеччыны не забаронена, аднак Дарнау не ўказаў сваё прадпрыемства ў дэкларацыі, якую падаваў адміністрацыі зямельнага парламента. Згодна з рэгламентам ландтага Саксоніі, кожны дэпутат павінен даць справаздачу аб сваім бізнэсе і іншых працах.
На сайце зямельнага парламента пазначана толькі кампанія Дарнау з яго роднага горада Борна недалёка ад Лейпцыга. Ні аб якіх кампаніях, зарэгістраваных у Беларусі, дэпутат не заяўляў.
«Дарнау не паведамляў парламенту ніякай інфармацыі пра якую-небудзь прадпрымальніцкую дзейнасць у Беларусі. Пасля адпаведнага паведамлення ад Welt am Sonntag кіраўнік парламента зямлі папрасіў спадара Дарнау пракаментаваць сітуацыю», – заявіла прадстаўніца парламента Іва Клатэ на пытанне Bild.
У выпадку, калі парушэнне рэгламенту будзе даведзенае, Дарнау можа атрымаць значны штраф. У найгоршым выпадку яму давядзецца выплаціць больш за 40 тысяч еўраў.
Сам Дарнау пакуль што не каментуе сітуацыю.