Навукоўцы выпадкова знайшлі 1000 невядомых аб'ектаў у Сонечнай сістэме

Яны «хаваліся» ў архіўных звестках «Хабла».

Касмічны тэлескоп «Хабл» знаходзіцца на арбіце ўжо 34 гады, але ўсё яшчэ прадаўжае рабіць адкрыцці. І некаторыя з іх адбываюцца выпадкова, паведамляе Science Alert.

Дзякуючы міжнароднай камандзе цывільных навукоўцаў, астраномам Еўрапейскага касмічнага агенцтва (ЕSА) і алгарытмам машыннага навучання ў архіўных звестках «Хабла» знайшлі 1000 раней невядомых астэроідаў Сонечнай сістэмы.

Даследчую групу ўзначаліў Пабла Гарсія-Марцін, навуковы супрацоўнік кафедры тэарэтычнай фізікі Аўтаномнага ўніверсітэта Мадрыда (UAM). У яе ўвайшлі прадстаўнікі ЕSА, Лабараторыі рэактыўнага руху NASA (JPL), Астранамічнага інстытута Румынскай акадэміі, Універсітэта Краёвы, Універсітэта Блакітнага берагу і Bastion Technologies.

Астэроіды – гэта матэрыял, які застаўся пасля фармавання Сонечнай сістэмы 4,5 мільярда гадоў таму. Гэтыя аб'екты бываюць розных формаў і памераў. Назіранні за астэроідамі – няпростая задача, паколькі яны досыць цьмяныя і ўвесь час рухаюцца па арбіце вакол Сонца. Але з тым як «Хабл» круціцца вакол Зямлі, ягоны пункт гледжання змяняецца, што дазваляе яму назіраць за астэроідамі, якія ідуць па сваіх арбітах.

Паводле адной з тэорый, меншыя астэроіды з'яўляюцца фрагментамі буйнейшых, якія сутыкаліся цягам мільярдаў гадоў. Іншая ж абвяшчае, што яны ўтварыліся менавіта такімі і з тых часоў ужо не мяняліся.

Але астраномы не могуць знайсці праўдападобнага тлумачэння таму, чаму гэтыя меншыя астэроіды не прадаўжалі назапашваць матэрыял з калязорнага дыска, які атачаў Сонца.

У каманду новага даследавання ўвайшлі 11482 цывільныя навукоўцы, якія вывучылі 37000 архіўных малюнкаў «Хабла» за 19 гадоў. У выніку быў знойдзены 1701 след астэроідаў, з якіх 1031 адпавядаў раней не каталагізаваным астэроідаў. Дыяметр прыкладна 400 з іх складаў менш за кіламетр.