Беспілотнікі атакавалі найбуйнейшы НПЗ у Калужскай вобласці РФ

Пасля выбухаў успыхнуў маштабны пажар.

У Калужскай вобласці РФ беспілотныя лятальныя апараты атакавалі нафтаперапрацоўчы завод. У выніку прылёту ўзнік пажар.

Пра гэта паведамляе РБК-Украіна са спасылкай на расейскія СМІ.

Са звестак СМІ, у Дзяржынскім раёне недалёка ад станцыі Палатняны завод каля гадзіны ночы раздаліся некалькі магутных выбухаў. Паведамлялася аб рабоце СПА.

Відавочцы распавялі, што перад гэтым былі чутныя характэрныя гукі пралёта некалькіх БПЛА, пасля чаго стаў бачны пажар і дым у раёне мясцовай нафтабазы «Першы завод».

Расейскія СМІ паведамляюць, што пажар на заводзе лакалізаваны, ахвяр няма.

Са слоў мясцовых жыхароў, супрацоўнікі былі эвакуаваныя з НПЗ у раёне 12 ночы.

ТАА «Першы завод» – найбуйнейшы нафтаперапрацоўчы завод у Калужскай вобласці Расеі. Асноўны комплекс у перапрацоўцы таварнай нафты і газакандэнсату. Намінальная магутнасць перапрацоўкі нафты складае 1,2 мільёна тон за год.

Гэты НПЗ ужо атакавалі 15 сакавіка.

Губернатар Калужскай вобласці Уладзіслаў Шапша паведаміў, што сёння ноччу ў выніку падзення БПЛА на тэрыторыі прадпрыемства ў Дзяржынскім раёне адбылося ўзгаранне. На месца накіраваныя аператыўныя падраздзяленні для ліквідацыі ўзгарання.

«Цяпер пажар ліквідаваны. З папярэдніх звестак пацярпелых няма. Праводзіцца ацэнка сумы пашкоджання інфраструктуры прадпрыемства», - паведаміў ён.