ГУР апублікавала спіс расейцаў, якія маюць дачыненне да ўдараў «Кінжаламі» па Украіне

У ім 29 чалавек.

Аператыўнікі і аналітыкі Галоўнай управы разведкі ідэнтыфікавалі 36 расейцаў, якія маюць дачыненне да ўдараў ракетамі «Кінжал» па Украіне.

Поўны спіс абнародаваны на сайце ГУР.

У ім 29 чалавек каманднага, лётнага і тэхнічнага складу 44-га асобнага авіяцыйнага палка асаблівага прызначэння далёкай авіяцыі ПКС РФ і сем афіцэраў з ліку тэхнічнага персаналу палка.

Як расказалі ў ГУР, 44-ы полк быў сфармаваны 1 снежня 2021 года. Месца ягонай сталай дыслакацыі – аэрадром Саваслейка Ніжагародскай вобласці РФ.

Полк мае двухэскадрыльную структуру, штатна да 24 самалётаў, а менавіта знішчальнікаў-перахопнікаў далёкага дзеяння МіГ-31К.

Украінскія выведнікі таксама вызначылі бартавыя нумары самалётаў МіГ-31К са складу палка: RF-20862, RF-03230, RF-20882, RF-03231, RF-03234, RF-19275, RF-94268, RF-42251, RF-4225 RF-20867, RF-20883.

Гэтыя самалёты з'яўляюцца носьбітамі ракетаў Х-47М2 «Кінжал». Баявая частка ракеты – 500 кг, можа быць і ядзерны зарад. Прызначэнне гэтых ракетаў – нанясенне максімальна хуткіх удараў на дыстанцыі да 2000 км.

Гіпергукавая хуткасць палёту ракеты на фінальным адрэзку дасягаецца дзякуючы разгону самалёта-носьбіта да звышгукавых параметраў (гэта значыць МіГ-31К выконвае ролю «першай прыступкі» ракеты).

«За кожнае здзейсненае супраць Украіны ваеннае злачынства будзе справядлівая адплата», – адзначылі ў ГУР.