Паліцыя Славакіі выставіла абвінавачанне стралку ў Фіца

Стала вядома, што яму пагражае.

Паліцыя Славакіі выставіла абвінавачанне мужчыну, які спрабаваў учыніць наўмыснае забойства прэм'ера краіны Роберта Фіца. Яму пагражае пажыццёвае зняволенне.

Пра гэта паведамляе агенцтва tvnoviny.sk.

Раніцай у чацвер, 16 траўня, пенсіянеру выставілі абвінавачанне ў замаху на наўмыснае забойства. Мяркуецца, што ён учыніў яго з помсты і ў дачыненні да асобы, якая знаходзіцца пад абаронай. Матывам забойства была нязгода з палітыкай цяперашняй улады і зменамі, якія яна ажыццявіла ці плануе ажыццявіць.

За гэтае злачынства яму пагражае пакаранне ў выглядзе 25 гадоў пазбаўлення волі ці пажыццёвае зняволенне, калі яго віна будзе даказаная.

Стралок расказаў паліцыі, што спланаваў напад за некалькі дзён да гэтага. Ён планаваў нанесці шкоду прэм'ер-міністру, але не меў намеру забіваць яго. Зброя знаходзілася ў яго ў законным валоданні больш за 30 гадоў.

71-гадовы мужчына зрабіў пяць стрэлаў у Фіца, тры з якіх трапілі ў яго.

Праваахоўнікі дэталёва абследавалі месца здарэння, выкарыстоўваючы 3D-сканер.

15 траўня а 23:00 падазраванага Юрая Цынтулу прывезлі да ягонага аўтамабіля, на якім ён прыехаў у горад Гандлава.

Аўто абшукалі і знайшлі ў ёй мабільны тэлефон стралка. Потым аўтамабіль арыштавалі. Тым часам у Левіцы супрацоўнікі паліцыі ахоўвалі шматкватэрны дом, дзе пражываў стралок разам з жонкай.