Маск паскардзіўся на нежаданне Цукерберга выйсці з ім на бой

Заснавальнік SpaceX заявіў, што гатовы правесці бой з кіраўніком Meta ў любы час.

Заснавальнік SpaceX Ілан Маск нагадаў у сацсетцы Х (Twitter) пра магчымасць двубою паміж ім і кіраўніком карпарацыі Meta Маркам Цукербергам.

Бізнэсмэн заявіў, што гатовы правесці бой з Цукербергам у любы час. Так ён адрэагаваў на пост партала Not the Bee пра будучыя дэбаты Джо Байдэна і Дональда Трампа.

«Калі б толькі Цукерберг быў такім жа крутым. <...> Я прапаноўваў бой у любым месцы, у любы час, паводле любых правілаў, але чую толькі стракатанне цвыркуноў», – напісаў Маск.

Летам 2023 года Маск заклікаў Цукерберга правесці бой у клетцы. Прапанова паступіла на фоне навінаў пра стварэнне Meta сацсеткі Threads, канкурэнта Х. Тады прадпрымальнік заявіў, што запуск такой платформы паставіць чалавецтва «выключна пад абцас» Цукерберга.

Кіраўнік Meta прыняў прапанову пра двубой. Пазней узнікла ідэя правесці дэбаты замест паўнавартаснага бою.

У сярэдзіне жніўня Цукерберг абвінаваціў Маска ў несур'ёзных паводзінах і ўхіленні ад двубою. Праз некалькі дзён заснавальнік SpaceX удакладніў, якое месца падышло б Цукербергу для бою. Паводле ягоных словаў, Італія прапанавала вылучыць Калізей, а сам ён гатовы запрасіць спаборніка ў свой дом.