Reuters: Колькасць вылетаў NATO на перахоп самалётаў РФ над Балтыкай вырасла на 20%
5- 17.05.2024, 9:56
- 2,736
Заўважаны змены ў складзе расейскіх самалётаў.
З пачатку 2024 года колькасць вылетаў знішчальнікаў NATO для перахопу расейскіх самалётаў, якія набліжаюцца да паветранай прасторы супольнікаў над рэгіёнам Балтыйскага мора, вырасла на 20-25%. Пра гэта паведаміла выданне Reuters (пераклад-liga.net) са спасылкай на неназванага суразмоўцы ў Альянсе.
Суразмоўца выдання адмовіўся назваць канкрэтныя лічбы колькасці палётаў расейскай ваеннай авіяцыі, зафіксаваных паблізу тэрыторыі NATO. Але ў канцы 2023 года Альянс паведамляў, што знішчальнікі сіл NATO больш за 300 разоў паднімаліся ў неба на перахоп ваенных самалётаў РФ, пры гэтым большасць інцыдэнтаў адбылося менавіта над Балтыйскім морам.
Суразмоўца адзначыў, што ў NATO заўважылі змены ў складзе самалётаў РФ, адзначаных паблізу ад тэрыторыі Альянсу. У адрозненне ад мінулага, зараз заходнія пілоты амаль не выяўляюць набліжаных да паветранай прасторы супольнікаў расейскіх знішчальнікаў і стратэгічных бамбавікоў, часцей гэта самалёты назірання або транспартная авіяцыя.
Таксама суразмоўца распавёў, што расейскія вайсковыя самалёты ўжо даўно не перадаюць код транспондэра, які паказвае на іх месцазнаходжанне і вышыню, не паказваюць план палёту і не камунікуюць з авіядыспетчарамі.