Эстонія забудуе пляц, які планавала аддаць Расеі

Надзел Талін збіраўся аддаць Маскве ў абмен на Саатсескі бот.

Улады Эстоніі пастанавілі забудаваць надзел на мяжы з Расеяй, які раней планавалася абмяняць з Масквой на зямлю ў Пскоўскай вобласці. Пра гэта паведаміў міністр унутраных спраў рэспублікі на прэс-канферэнцыі ўрада, паведаміў партал эстонскага дзяржтэлерадыё ERR.

Міністры замежных спраў Расеі і Эстоніі падпісвалі дамовы аб дзяржаўнай граніцы і размежаванні марскіх прастор у 2005 і 2014 гадах, але дакументы так і не былі ратыфікаваныя.

«Тады планавалася, што мы можам, напрыклад, атрымаць так званы Саатсескі бот. Як вы ведаеце, гэты пляц зараз у руках Расеі, і жыхарам Эстоніі даводзіцца праз яго праязджаць. Узамен мы павінны былі аддаць такога ж памеру надзел нашай лясной зямлі дзесьці побач з мяжой», - сказаў Лаўры Ляэнэметс.

З яго слоў, цяпер «відавочна, што праводзіць такі абмен з Расеяй мы больш не маем намеру». Таму ўлады Эстоніі пастанавілі пачаць будаўніцтва прымежнай інфраструктуры без уліку дасягнутых тады пагадненняў.

Выдзелены надзел мае працягласць 4 км. Праектаванне і будаўніцтва мяжы пойдзе з выключэннем з плана гэтай тэрыторыі, «паколькі які-небудзь абмен зямлёй з Расеяй мы, напэўна, не станем праводзіць яшчэ некалькі дзесяцігоддзяў, а то і стагоддзяў», — зазначыў міністр.

На яго думку, цяпер «людзі змогуць перамяшчацца па гэтай дарозе, а не праз тэрыторыю Расеі, дзе нельга спыняцца — адзін Бог ведае, што можа здарыцца, калі людзям давядзецца там спыніцца і ў Расеі з'явіцца магчымасць, так бы мовіць, ужыць сілу на сваёй тэрыторыі».

Саатсескі бот (воласць Сетамаа) – частка Пячорскага раёна Пскоўскай вобласці, якая заходзіць на эстонскую тэрыторыю. Масква і Талін амаль 20 гадоў вялі перамовы наконт дамовы аб мяжы. У 2005 годзе дакумент падпісалі, але потым подпісы давялося адклікаць праз жаданне эстонскага боку ўключыць у паперу згадкі пра Тартускую мірную дамову. Па ёй часткай Эстоніі прызнаваўся Пячэрскі раён Пскоўскай вобласці, які ў 1944 годзе адышоў Расеі.