Салаўёў зняславіўся праз жарт пра выдуманага агента Масада «Элі Коптэра»

Расейскі прапагандыст заявіў, што за смерцю прэзідэнта Ірана можа стаяць выдуманы персанаж.

Расейскі прапагандыст Уладзімір Салаўёў у сваёй вячэрняй праграме на канале «Расія 1», прысвечанай гібелі прэзідэнта Ірана Ібрахіма Раісі, заявіў:

«Сёння нечакана французскі канал выдаў такое: «Група ХАМАС, якая выказваецца ў Telegram, сцвярджае, што пілот верталёта быў агентам Масада. Ён нават называе імя: Элі Копта. Праўда гэта ці не, але, вядома ж, гэта частка тых чутак, якія ходзяць».

Гэта палітычны аналітык Даніэль Хаік на французскім канале 24 News.

Ёсць такая кніга, якую напісаў ізраільскі гісторык, складана вызначыць, мусіць, вайсковы гісторык; яна называецца «Паўстань і забі першым. Гісторыя палітычных забойстваў». Ён пісаў сваю кнігу, нягледзячы на вялікую колькасць пратэстаў, яму спрабавалі перашкодзіць і ён апісвае як практыку і тлумачыць, чаму для Ізраіля палітычныя забойствы з'яўляюцца абсалютна прымальнай формай барацьбы за выжыванне сваёй краіны.

Амерыка ўчыніла каласальную колькасць палітычных забойстваў. Я не памятаю ніводнага выпадку, каб гэтыя краіны ў момант прызнаваліся: так, гэта мы. Таму, калі Ізраіль кажа «не-не, гэта не мы»… Пачакайце, а што, калі б гэта былі вы, вы б прызналіся, ці што? <…> Чаму, калі амерыканцы могуць на тэрыторыі трэцяй краіны забіць адну з легенд Корпуса вартавых ісламскай рэвалюцыі, кіраўніка, які па статусе быў адным з самых папулярных вайсковых лідараў Ірана, што магло перашкодзіць учыніць забойства прэзідэнта?»

Як піша The insider, блытаніна ў Салаўёва ці ледзь не ў кожнай фразе. Даніэль Хаік выступаў не на французскім, а на ізраільскім міжнародным канале i24, у яго франкамоўнай версіі. Кнігу, пра якую ён кажа, напісаў не гісторык, а журналіст, нядаўні лаўрэат Пулітцэраўскай прэміі Ронэн Бергман; яна называецца «Паўстань і забі першым. Тайная гісторыя ізраільскіх кропкавых ліквідацый». Зрэшты, усё гэта дробязі ў параўнанні з інфармацыйнай нагодай, якая выклікала такі гнеўны маналог расейскага прапагандыста.

Справа ў тым, што з Даніэля Хаіка смяецца ці ледзь не ўвесь Ізраіль: ён прыняў за чыстую манету жарт, які пасля гібелі Раісі стаў даволі папулярным у сацсетках. Чамусьці ён, а ўслед за ім і Салаўёў, не заўважыў, што імя «ізраільскага пілота-камікадзэ» падазрона сугучнае слову helicopter - верталёт. Менавіта пры падзенні верталёта і загінуў іранскі прэзідэнт.

Ізраільскае выданне The Jewish Chronicle піша:

«Жарт пра Элі Коптэра, відаць, узнік у Twitter/X і быў распаўсюджаны ў ізраільскіх групах Whatsapp, а пазней быў апублікаваны як факт на каналах ХАМАС у Telegram.

Жарт уяўляе сабой гульню слоў з выкарыстаннем распаўсюджанага габрэйскага імя Элі; мяркуецца, што агент Масада стаў прычынай катастрофы верталёта, на борце якога знаходзіліся высокапастаўленыя іранскія чыноўнікі. Пасля памылкі Хайка ён зноў з'явіўся ў Twitter, дзе некаторыя карыстачы нават выкарыстоўвалі штучны інтэлект для стварэння выдуманага пілота верталёта.

У гібелі іранскага прэзідэнта Ібрагіма Раісі і міністра замежных спраў Хасэйна Аміра Абдалахіяна няма ніякіх прыкмет несумленнай гульні, а на кадрах з месца катастрофы бачны густы туман у рэгіёне Усходняга Азербайджана ў Іране».