У якіх выпадках ахоўнік у краме можа даглядаць асабістыя рэчы беларусаў?

І што рабіць, калі вы не хочаце.

Ахоўнікі крам у некаторых выпадках могуць папрасіць пакупніка паказаць асабістыя рэчы на выхадзе з касавай зоны. Юрысты распавялі, як паводзіць сябе ў такой сітуацыі, піша s13.ru.

Згодна з заканадаўствам, у ахоўніка ёсць права даглядзець асабістыя рэчы, аднак на гэта павінны быць важкія прычыны.

Даглядаць рэчы супрацоўнік можа толькі ў тым выпадку, калі ў крамы ёсць уласнае падраздзяленне аховы. Пры гэтым ахоўнік павінен паказаць службовае пасведчанне і жэтон, якія павінны быць зацверджаныя паводле формаў 404-й пастановы МУС.

Акрамя таго, супрацоўнік абавязаны агучыць падставы надгляду. Сярод іх:

ахоўнік выявіў, што пакупнік збіраецца нешта выкрасці ці ўжо зрабіў гэта;

відавочцы або супрацоўнік сам з дапамогай сістэм кантролю або відэаназірання заўважылі, што пакупнік нешта ўзяў і не заплаціў;

на вопратцы і (або) рэчах пакупніка ёсць сляды супрацьпраўнага замаху, напрыклад, біркі, кліпсы супраць крадзяжоў.

Пры гэтым ахоўнікі не маюць права праводзіць надгляд адзення, якое чалавек надзеў. Калі ёсць падазрэнні, што пакупнік захацеў вынесці тавар на сабе, ахоўнік абавязаны выклікаць міліцыю. У супрацоўнікаў МУС ёсць права праверыць пакупніка.

Для абароны сваіх правоў пакупнік можа папрасіць дазволу на відэа-або аўдыёфіксацыю надгляду (каб такі довад уважаўся легальным, згода павінна быць). Парушэнне сваіх правоў можна зафіксаваць у пратаколе (калі ён складаецца) і (або) у кнізе заўваг і прапаноў крамы.