Флот NATO выгнаў танкеры Пуціна з найбуйнейшай стаянкі ў Міжземным моры

Танкеры, якія транспартуюць расейскую нафту, пакінулі Лаконскі заліў.

Танкеры, якія транспартуюць расейскую нафту, пакінулі Лаконскі заліў – ключавую стаянку ў Міжземным моры, дзе сыравіна перавальвалася з карабля на карабель для далейшай дастаўкі ў Азію.

Як паведамляе Bloomberg, з пачатку траўня танкеры «ценевага флоту» больш не заходзяць у самы паўднёвы заліў мацерыковай Грэцыі і ўсёй Еўропы, праз які пралягае марскі шлях у кірунку Суэцкага канала.

Прычына – у ваенна-марскіх вучэннях, якія праводзіць флот краінаў NATO. Гідраграфічная служба Грэцыі анансавала манеўры ў Лаконскім заліве з 1 да 9 траўня. Усяго ў Міжземным моры да канца месяца адбудзецца не менш за 5 вучэнняў флоту NATO, у тым ліку манеўры са стрэльбамі, вынікае з звестак Службы навігацыі, гідраграфіі і акіянаграфіі Турцыі.

У вучэннях, якія названыя «Удар Нептуна» (Neptune Strike) і прадоўжацца да 10 траўня, возьмуць удзел ваенныя караблі, падлодкі і авіяносцы ЗША, Вялікай Брытаніі, Францыі, Нямеччыны, Грэцыі, Італіі, Нарвегіі, Нідэрландаў, Польшчы, Румыніі, Гішпаніі, Турцыі, Швэцыі, Балгарыі, Даніі і Албаніі.

Паводле звестак Міжнароднай групы клубаў страхавання адказнасці караблеўладальнікаў (International Group of P&I Clubs), на красавік 2024 года ў «ценевы флот» Расеі перайшлі блізу 800 танкераў. Яны возяць сыравіну кліентам у абыход санкцый і без міжнароднай страхоўкі, якая пакрывае сярод іншага рызыкі разліву нафты.

З кастрычніка мінулага года ЗША ўвялі санкцыі супраць 50 танкераў «ценевага флоту», а таксама іх уладальнікаў. У «чорныя спісы», сярод іншых, увайшлі SUN Ship Management D., Hennesea Holdings з ААЭ, а ў студзені – «Саўкамфлот», найбуйнейшы дзяржаўны ўладальнік танкераў, які да вайны меў флот з 110 караблёў, у тым ліку самы вялікі ў свеце ў танкерах класу Aframax.