Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Леанід Кучма ў панядзелак у праграме "Подробности" (РТР) выказаў сумневы ў мэтазгоднасьці ўступленьня ў саюз Расеі й Беларусі, бо не бачыць эканамічнай падставы для падтрымкі гэтага палітычнага аб`яднаньня: "Сёньня Расея ня ў стане пацягнуць нават Беларусь, а тым болей, умоўна кажучы, пракарміць 50 мільёнаў украінцаў", сказаў прэзыдэнт.
Газэта "Беларускi час" прапанавала чытачам свайго апошняга нумару меркаваньне дырэктара Незалежнага інстытута сацыяльна-эканамічных і палітычных дасьледаваньняў Алега Манаева пра сытуацыю, якая склалася ў краіне. Нягледзячы на тое, што сацыялёгія ў таталітарных дзяржавах - навука недакладная, некаторыя факты й лічбы НІСЭПД прадстаўляюць інтарэс. Так, па словах Манаева, узровень незадаволенасьці людзей расьце й набліжаецца да крытычнай кропкі.
Сёлета пастаўкі расейскай нафты ў Беларусь скараціліся. Так, з 1 студзеня па 12 лютага на беларускія нафтаперапрацоўчыя заводы (НПЗ) паступіла 1.374 тысячы тонаў нафты, што на 13 адсоткаў меньш, чым за аналягічны леташні перыяд.
19 лютага прад`яўлена абвінавачаньне сыну экс-прам`ера Беларусі Міхаіла Чыгіра Аляксандру, які знаходзіцца ў сьледчым ізалятары ГУУС Мінгарвыканкаму. Як паведамілі БелаПАН у прэс-цэнтры МУС, следчым упраўленьня Сьледчага камітэту пры МУС Рэспублікі Беларусь Аляксандру Чыгіру прад`яўлена абвінавачаньне па артыкулу 205, частка 4 Крымінальнага кодэксу Рэспублікі Беларусь - тайны крадзеж маёмасьці, учынены паўторна групаю асобаў у асоба буйных памерах.
Суд над намесьнiкам старшынi БНФ, старшынём Маладога Фронту Паўлам Севярынцам скончыўся вечарам 19 лютага ў судзе Цэнтральнага раёну Менску. Паводле часткi 2 артыкулу 167.1 КаАП РБ Павал Севярынец абвiнавачваўся ў арганiзацыi 14 лютага 2001 г. несанкцыянаванага сходу на пл. Свабоды, i несанкцыяванага маладзёвага шэсьця да пл. Перамогi. Судзьдзя прызнала Севярынца віноўным і прысудзіла штраф у 150 мінімальных заробкаў (каля 500 даляраў).
19 лютага ў Гомлі пасьля тыднёвага перапынку працягвалася слуханьне крымінальнае справы ў дачыненьні да супрацоўнікаў Гомельскага дзяржаўнага медінстытуту. Учора абарона абвінавачваемых выступіла с шэрагам хадайніцтваў. У прыватнасьці, адвакат прафесара Бандажэўскага Аляксандр Баранаў прасіў суд дапытаць у якасьці сьведкаў прадстаўнікоў прэзыдэнцкай камісіі па кантролю за ходам уступных экзаменаў, якія курыравалі непасрэдна Гомельскі медінстытут, а менавіта: Валеры Цапкалу, які працуе цяпер амбасадарам Беларусі ў ЗША, намесьніка міністра аховы здароўя Аляксандра Курчанкова і аднаго з кіраўнікоў Гомельскага ўпраўленьня КДБ. Старшыня ваеннай калегіі Вярхоўнага суда Уладзімір Сукач адхіліў гэтае хадайніцтва, паколько яно "не садзейнічае высвятленьню абставінаў".
Як высьветлілася, у Менску на працягу двух гадоў дзейнічала моцная групоўка кампутарных злачынцаў, якія спэцыялізаваліся на махінацыях з крэдытнымі картамі - так званыя "кардэры". Здабываючы з дапамогаю Інтэрнэту нумары чужых крэдытных картак і дадзеныя на іх уладальнікаў, беларускія хакеры-кардэры атаварваліся ў онлайнавых магазінах па ўсім сьвеце - ад Новай Зеландыі да Бельгіі й Нямеччыны. Набываліся пераважна дарагая кампактная тэхніка - цыфравыя фотаапараты, МРЗ-плэеры, сотавыя тэлефоны, ноутбукі, кампутарныя складальнікі і г.д. Пасьля набыцьця адпраўляліся з дапамогаю міжнародных службаў дастаўкі на адрэсы падстаўных асобаў. Так, напрыклад, часта выкарыстоўвалі ні пра што не здагадваючыхся 70 - гадовых старых. Такі бабуля й дзядуля атрымоўваў $ 5 за атрыманьне пасылкі коштам у сотні й тысячы даляраў. Беларуская міліцыя, хаця й неаднаразова выхвалялася сваёй "вялікай базаю дадзеных па хакерам", даведалася пра тое, што адбываецца ад Інтэрполу, куды, у сваю чаргу зьвярнулася адна з нямецкіх фірмаў - "Fotojank". Па словах кіраўніцтва гэтай кампаніі, беларускія кардэры скралі партыю цыфрафых фотаапаратаў на суму 69 тыс. нямецкіх марак.
