Сьледчы камітэт зьняў з Міхаіла Чыгіра абвінавачваньне ў крадзяжы 1 мільёну даляраў :: Хартыя'97 :: Навiны

З экс-прэм’ера Міхаіла Чыгіра зьнялі абвінавачваньне ў крадзяжы мільёну даляраў. Пра гэта яму паведамілі на чарговым допыце ў сьледчым камітэце пры Міністэрстве ўнутраных справаў. Сьледчыя спасылаліся на тое, што прайшоў тэрмін даўнасьці гэтага злачынства. Што да былых абвінавачваньняў ў нявыплаце падаткаў, то іх пакінулі.

Між тым, экс-прэм’ер ня згодны з афіцыйнай фармулёўкай зьняцьця з яго абвінавачваньняў у крадзяжы банкаўскіх грошай. Чыгір заяўляе, што будзе дабівацца, каб суд прызнаў яго менавіта невіноўным.

“Закрыцьцё справы з прычыны сканчэньня тэрміну даўнасьці ня здымае зь мяне падазрэньняў ў тым, што я не рабіў. Пакуль гэтая пляма з маёй рэпутацыі ня змыта, я не спынюся. Да гэтага ж, няма адказу на маё ытаньне, хто насамрэч віноўны ў траце мільёну даляраў? Калі сьледчых гэта ўжо не цікавіць, то мне неабыякавы лёс дзяржаўных грошай. Я настойваю, каб гэтая справа зноў трапіла ў суд, і там была пастаўленая канчатковая кропка ў гэтай гісторыі”, -- заявіў у інтэрвію Радыё Свабода Міхаіл Чыгір.

Нагадаем, што напрыканцы мінулага года Менскі гарадзкі суд ужо прызнаваў віну Міхаіла Чыгіра ў крадзяжы банкаўскіх грошай недаказаннай, але пракуратура гэтае рашэньне аспрэчыла.