Жорсткая школа для ЗУБРа :: Хартыя'97 :: Навiны

Вучань восьмай клясы сш №5 Салігорску Аляксандар Гулькевіч зьвярнуўся ў Салігрскае аддзяленьне Беларускага Гэльсынскага Камітэту 27 кастрычніка. У сваёй заяве школьнік давёў, што дырэктар школы Валянціна Аркадзьеўна Ястраб выклікала яго да сябе ў кабінет. Там яна і завуч школы па сацыяльнай рабоце спрабавала прымусіць падлетка прызнацца ў тым, што той напісаў на цяпліцы пры школе слова “ЗУБР”. Калі Саша адмовіўся прызнаць віну, дырэктар, якая, дарэчы, зьяўляецца заслужаным настаўнікам БССР, ударыла вучня кулаком у твар, а таксама пагражала, што калi ён не “прызнаецца” да прыхода міліцыі, то будзе яшчэ горш.

Кіраўнік Салігорскага аддзяленьня БГК Ларыса Насановіч тлумачыць, што ніхто з выкладчыкаў ці вучняў ня бачыў, як Саша што-небудзь пісаў на цяпліцы. Усе перасьледы тлумачацца тым, што носіць значку руху ЗУБР.

Сацыяльны педагог школы прымушала яшчэ двух іншых вучняў той самай клясы - братоў Аляксандра і Сяргея Падсекіных - абгаварыць сябе і Гулькевіча.

Супрацоўнікі Салігорскага аддзяленьня БГК напісалі скаргу ў пракуратуру. Аднак на днях адтуль прыйшла адмова пра ўзбуджэньне крымінальнае справы на падставе адсутнасьці складу злачынства. Узбудзіць крымінальную справу адносна Аляксандра Гулькевіча па просьбе дырэктара школы на паклёп пракуратура адмовіла на падставе таго, што той ня можа прыцягвацца да адказнасьці таму, што ён не дасягнуў шаснаццацігадовага ўзросту.

Нагадаем, што перасьлед школьнікаў распачаўся ў Салігорску ў канцы верасьня. Тады яны напісалі зварот да старшыні Салігорскага выканкаму Галіны Петрашка і самому Аляксандру Лукашэнку з патрабаваньнем узнавіць будаўніцтва школы №13, якое ўжо некалькі гадоў стаіць на месцы. У сярэдзіне кастрычніка некалькіх навучэнцаў выклікалі на допыты ў пракуратуру, дзе сьледчыя высьвятлялі, з чыёй ініцыятывы напісаны ліст, а дзесяцёх вучняў СШ №3 паставілі на ўнутрышкольны ўлік.

Зараз дзяцей пачалі зьбіваць.