 | ПАЛIТЫКА | |
Расейска-беларуская інтэграцыя вачыма расеянаў: і хочацца, і колецца
11:20, 27/11/2001
Расейскі Фонд Грамадзкае думкі правёў у канцы лістапада чарговае апытаньне думкі грамадзянаў гэтай краіны адносна працэсу аб’яднаньня Расеі й Беларусі, што так старанна навязваецца ўладамі дзьвюх краінаў. Як і раней, у гэтым пытаньні верх бярэ “загадкавая руская душа”, якая прагне аб’яднаньня дзьвюх краінаў насуперак здароваму сэнсу і эканамічнаму дабрабыту, толькі ў імя ўзнаўленьня “былой магутнасьці”. Зараз за поўны саюз выказаліся 45% апытаных, 28% -- за супрацоўніцтва ў сфэры эканомікі й каля 15% рэспандэнтаў аказаліся поўнымі праціўнікамі любых саюзаў. 
11:19, 27/11/2001
«Савет рэспублікі нацыянальнага сходу» дагэтуль не атрымліваў ніякіх дакумэнтаў ад генэральнага пракурора ў сувязі з абвінавачаньнямі, вылучанымі ў адносінах да «дэпутата» Віктара Рахманько. Пра гэта заявіў «сьпікер савету рэспублікі» Аляксандр Вайтовіч. Адпаведна і пракамэнтаваць сытуацыю і спрагназаваць яе далейшае развіцьцё ён ня змог.
11:18, 27/11/2001, «Вечерний Минск»
Пасьля нядаўніх “баявых” дзеяньняў ва ўрочашчы Курапаты зацікаўленыя ў вырашэньні няпростай сытуацыі бакі селі за стол перамоваў. Адначасова з узнаўленьнем у раёне ўрочышча працаў па рэканструкцыі кальцавой дарогі грамадзкая ініцыятыва “За ўратаваньне мэмарыялу “Курапаты” наладзіла асабістае назіраньне за ходам будаўніцтва. І, як гэта ў нас бывае, рэвізоры вызначылі шэраг спрэчных момантаў, якія і леглі ў аснову размовы абаронцаў Курапатаў з праэктыроўшчыкамі рэканструкцыі МКАД з РУП “Белгіпрадор”.
11:17, 27/11/2001
На думку аднаго з членаў аргкамітэту БСДП, Міхася Чарняўскага, у краіне, дзе існуе больш за палову дзесятка сацыял-дэмакратычных арганізацыяў, даўно існуе праблема стварэньня адной партыі, якая аб’яднае гэтыя сілы. Ёсьць і іншая прычына стварэньня новай БСДП. У партыі даўно насьпеў раскол, яго галоўным арганізатарам, па словах удзельнікаў прэс-канферэнцыі, зьяўляецца Мікалай Статкевіч.
11:16, 27/11/2001
Павышэньне ў Беларусі з 1 сьнежня мінімальнага заробку істотна павялічыць выжаткі суб`ектаў гаспадараньня. Пра гэта заявіў БелаПАН прэзыдэнт Беларускай навукова-прамысловай асацыяцыі Мікалай Стральцоў, у камэнтары пастановы Савету Міністраў ад 21 лістапада, у адпаведнасьці з якой з 1 сьнежня памер МЗП складзе 10 тысяч рублёў, а тарыфная стаўка першага разраду - 19,5 тысячы рублёў. Стральцоў патлумачыў, што справа не столькі ў расходах на выплату зарплаты, колькі ў тым, што МЗП ужо даўно страціла сваё значэньне як мінімальны гарантаваны ўзровень аплаты працы й ператварылася ва ўмоўную разліковую адзінку, да якой прывязаны стаўкі штрафаў, падаткаў, натарыяльных пошлінаў і гэтак далей.
11:15, 27/11/2001
Паводле зьвестак Міністэрства статыстыкі й аналізу, за першыя тры тыдні лістапада рост спажывецкіх цэн у краіне склаў 2,4 адсоткі (за першы тыдзень - 0,7, за другі - 1,1, за трэці - 0,6). Для параўнаньня: за першыя тры тыдні кастрычніка кошіы павялічыліся на 2 адсоткі, верасьня - на 1,5. Большай за лістападаўскую інфляцыя была толькі ў красавіку, калі за тры тыдні кошты падняліся на 3 адсоткі. З пачатку года спажывецкія кошты ў Беларусі ўзрасьлі на 35,7 адсоткі (за гэты ж пэрыяд 2000 году - на 94 адсоткі, у тым ліку за першыя тры тыдні лістапада - на 3,6 адсоткі).
11:14, 27/11/2001
У лістападзе зноў узраслі тарыфы на жыльлёва-камунальныя паслугі для насельніцтва. На 2,5 адсоткі павялічылася квартплата (тэхабслугоўваньне) і плата за карыстаньне ліфтам, на столькі ж падаражэлі гарачая вада, ацяпленьне, халодная вада й каналізацыя, вываз і абясшкоджваньне адходаў. Газ падаражэў на 15 адсоткаў.
11:13, 27/11/2001
Агенцтва Reuters паведаміла 26 лістапада пра тое, што Асацыяцыя тэнісістаў – прафэсіяналаў апублікавала сьпіс самых высокааплочваемых тэнісістаў сьвету. Першае месца займае бразілец Густава Куэртэн, які зарабіў у 2001 г. $4 млн. расеянін Яўген Кафельнікаў апынуўся на 3 месцы і атрымаў прызавых ганарараў на $3,2 млн. Наш Максім Мірны стаіць на 13 месцы з ганарарамі ў 913.769 даляраў.
11:12, 27/11/2001
Беларуская апазыцыя занепакоеная магчымай легітымізацыяй "палаты прадстаўнікоў" у Парлямэнцкай Асамблеі АБСЭ. Сваю заклапочанасьць апазыцыянэры данесьлі да дэлегацыі адмысловай рабочай групы ў справах Беларусі, якая ўжо другі дзень знаходзіцца ў Менску. Вось што заявіў Радыё Свабода лідэр АГП Анатоль Лябедзька:
11:11, 27/11/2001
Супрацоўніка ГРТ Павал Шарамет, калега й сябра зьніклага паўтары гады таму ў Менску журналіста Зьміцера Завадзкага, дапыталі ўчора на судовым працэсе па справе выкраданьня Зьміцера. Шарамет адмовіўся раскрыць падрабязнасьці судовага допыту, спаслаўшыся на тое, што зь яго ўзялі падпіску аб неразгалошваньні. Журналіст падкрэсьліў, што па-ранейшаму прытрымліваюцца сваіх меркаванняў аб датычнасьці да зьнікненьня Завадзкага прадстаўнікоў кіраўніцтва рэспублікі, у прыватнасьці, сёньняшняга генпракурора Віктара Шэймана.
11:10, 27/11/2001
Мазаічная псыхапатыя Аляксандра Лукашэнкі прагрэсуе. Пацьверджаньнем таму сталі масавыя арышты чыноўнікаў і фукнцыянэраў рознага рангу, хваля якіх пракацілася па краіне ў апошні час. Учора, напрыклад, мы ўжо паведамлялі пра тое, што за два апошнія тыдні ў Беларусі пракурорамі ўзбуджана 210 крымінальных справаў. Імі санкцыянавана заключэньне пад варту 720 чалавек. У пачатку году доктар-псыхіятар Шчыгельскі папярэджваў аб тым, што “асаблівасьці грамадзяніна Лукашэнкі А.Р. у выпадку яго далейшага знаходжаньня пры ўладзе, з улікам клінічнай дынамікі, якая назіралася ў апошнія 6 гадоў, з высокай ступеняю верагоднасьці здольныя прывесьці да масавага тэрору й ўсталяваньню ў краіне абсалютна нічым не абмежаванай асабістай улады”.
11:09, 27/11/2001, Пасол Ганс-Георг Вік
Мы прапануем вам поўны тэкст выступу кіраўніка Кансультацыйна-назіральнае групы АБСЭ ў Беларусі Ганса-Георга Віка на “Менскім форуме”, што прайшоў у мінулыя выходныя. Як вядома, сп.Вік пакіне Беларусь да канца гэтага году. Пасол Вік заявіў, што рашэньне не заставацца ў Беларусі яшчэ на адзін тэрмін – гэта яго асабістае рашэньне, і на яго ніяк не паўплывалі абвінавачваньні ў адрас беларускіх уладаў, кіраўнік КНГ АБСЭ з’язджае зь Менску вельмі расчараваным. Пасол Вік выказаў вельмі жорсткую пазыцыю адносна апошніх прэзыдэнцкіх выбараў, паколькі ў Беларусі ўлады фактычна стварылі сыстэму маніпуляцыяў...
11:08, 27/11/2001
Вацлаў Гавал, прэзыдэнт Чэхіі, запрасіў лідэра Беларускага народнага фронту Вінцука Вячорку ў Прагу на сусьветную канферэнцыю “Форум –2001”. Вячорка ў сярэдзіне кастрычніка прымаў ўдзел у Пятай сусьветнай канферэнцыі “Форум-2001”. Лідэр Фронту па яе завяршэньні меў сустрэчы з шэрагам чэскіх парлямэнтараў і палітыкаў, а таксама з дэпутатамі расейскай Дзярждумы Кавалёвым і Яўлінскім. Сярод іншых уздымаліся пытаньні міжнароднага непрызнаньня сёлетніх прэзыдэнцкіх выбараў у Беларусі, а гэтаксама дапамога з чэскага боку беларускай грамадзянскай супольнасьці. Зараз прэзыдэнт Чэхіі запрасіў яго на “другі раўнд” Форуму: “я мяркую, што ў такі складаны час нам неабходна працягнуць традыцыю абмену меркаваньнямі па многіх актуальных праблемах”.
11:07, 27/11/2001
Суд Ленінскага раёну Гародні вынес 26 лістапада папярэджаньне двум журналістам закрытай па рашэньні Вышэйшага гаспадарчага суда Беларусі недзяржаўнай газеты "Пагоня" - Паўлу Мажэйку й Анджэю Пісальніку.
11:06, 27/11/2001
Беларусь была падвергнута “жорсткай крытыцы за няўплату ўзьнёскаў” ва ўсе інтэграцыйныя органы. Абстукцыя адбылася на паседжаньні міжпарлямэнцкіх асамблеяў (МПА) СНД і ЭўраАзЭС ў Пецярбургу. Беларусі паказалі на тое, што яна “запазычыла” МПА СНГ, МПА ЭўраАзЭС, “парлямэнцкаму сходу Саюзу Беларусі й Расеі” й бюджэту “саюзнае дзяржавы”. Пры гэтым сума запазычанасьцей “вельмі нязначная для краіны – каля 100 тысячаў даляраў”, перадае “Інтэрфакс”.
11:05, 27/11/2001
Нацыянальны банк Беларусі рэкамэндаваў сваім галоўным упраўленьням па абласьцях і гораду Менску пры разглядзе пытаньня аб працягу раней выдадзеных ліцэнзіяў на розьнічны гандаль й аказаньне паслуг грамадзянам за замежную валюту даваць дабро на тэрмін ня больш чым адзін год. Такая рэкамэндацыя дадзена ў сувязі з праводзімай палітыкай дэдалярызацыі эканомікі й звужэньня сфэры звароту замежнай валюты на тэрыторыі Беларусі. Зараз працяг ліцэнзіяў на розьнічны гандаль й аказаньне паслуг грамадзянам за замежную валюту можа рабіцца на тэрмін да трох гадоў.
11:04, 27/11/2001, ПРАЙМ-ТАСС
Экспарт нафты з Расеі ў далёкае замежжа за 25 дзён лістапада 2001 году павялічыўся ў параўнаньні з тым самым пэрыядам 2000 году на 2,9% да 9,732 млн.тонаў. Пра гэта паведаміла крыніца ў цэнтральным дыспетчарскім упраўленьні ТЭК. Здабыча нафты ў згаданы пэрыяд павялічылася на 8,3% да 24,452 млн. тонаў. Пастаўка нафты на перапрацоўку ў Расеі павялічылася на 6,8% да 12,777 млн.тонаў, на НПЗ Беларусі – на 4,8% да 808, 9 тыс.тонаў.
11:03, 27/11/2001
Латвія, Беларусь і Ўкраіна разглядаюць магчымасьць аднаўленьня гандлёвага шляху “з варагаў у грэкі” – кошт “каналу стагоддзя” можа пераўзысьці 5 млрд. даляраў. Як перадае карэспандэнт РІА "Новости", магчыма, што ў недалёкай будучыні гандлёвыя шляхі з паўночных і паўночна-заходніх краінаў на поўдзень зноў, як у ІХ-ХІ ст., пойдуць не вакол Эўропы, а наўпрост з Балтыйскага мора ў Чорнае і далей ў Міжмор’е. Такую магчымасьць прадугледжвае праэкт “Транзытны шлях Даўгава-Дняпро”. Ён прадугледжвае злучэньне каналам дзьвюх рэк, адна з якіх упадае ў Балтыйскае, а другая ў Чорнае мора, і тым самым стварэньне транзытнага вадзянога шляху даўжынёй 2 тыс. 330 кілямэтраў. Паводле папярэдніх разьлікаў, агульны кошт пераўзыйдзе 5 млрд. даляраў ЗША.
11:02, 27/11/2001
У Ніжнем Ноўгарадзе адкрыецца аддзяленьне амбасады Беларусі ў Расеі. У пастанове беларускага ўраду па дадзеным пытаньні адзначаецца, перадае карэспандэнт РІА "Новости", што гэты крок прадпрымаецца з мэтай разьвіцьця ўзаемавыгоднага міжрэгіянальнага супрацоўніцтва Ніжагародзкай вобласьці зь Беларусьсю і ў адпаведнасьці з раней дасягнутымі дамоўленасьцямі ўрадаў дзьвюх краінаў.
11:01, 27/11/2001
Створана Беларускае аддзяленне Акадэміі вайсковых навук Расейскай Федэрацыі. Яго кіраўніком абраны член-карэспандэнт АВН прафесар Мікалай Шэхаўцоў. Пра гэта БелаПАН паведамілі ў прэс-службе Міністэрства абароны. У склад Беларускага аддзяленьня АВН увайшлі тры секцыі, якія будуць праводзіць навуковыя экспэртызы абаронных праектаў, удзельнічаць у фармаваньні ваенна-тэхнічнай палітыкі, распрацоўваць праграмы ваенна-навуковых даследаваньняў, садзейнічаць падрыхтоўцы й павышэньню кваліфікацыі ваенных вучоных.
| |
|
