Завадзкі сустрэў у Чачэніі беларускі “эскадрон сьмерці”? :: Хартыя'97 :: Навiны

Былы супрацоўнік КДБ Генадзь Угляніца і актывіст арганізацыі “Край” Андрэй Жарнасек, якія знаходзяцца ў Нарвэгіі, заяўляюць, што групоўка Ігнатовіча не датычная да зьнікненьня журналіста Зьміцера Завадзкага. У інтэрвію Радыё Свабода яны заявілі, што Завадзкаму адпомсьцілі байцы спэцыяльнага атраду хуткага рэагаваньня (СОБР) пад камандаваньнем Зьміцера Паўлючэнкі (гэты атрад вядомы ў Беларусі як база “эскадрону сьмерці”, якая зьнічтажала няўгодных рэжыму Лукашэнкі людзей).

Угляніца й Жарнасек сцьвярджаюць, што байцы СОБРу неаднаразова наведвалі Чачэнію ў складзе расейскіх акупацыйных частак, дзе вялі баявыя дзеяньні супраць чачэнцаў. Падчас адной з камандзіровак у Чачэнію ў якасьці аператара Грамадзкай Расейскай Тэлевізіі Зьміцер Завадзкі мог ўбачыць кагосьці зь беларусаў. Пасьля, калі Зьміцер здымаў сьвяты з удзелам байцоў брыгады спэцыяльнага прызначэньня 3214, часткай якой зьяўляецца СОБР, журналіст змог апазнаць тых людзей, якіх ён бачыў у складзе чужой арміі. Гэта, на думку Жарнасека і Ўгляніцы, і магло стаць прычынаю, па якой маглі ліквідаваць журналіста, які меў пэўную інфармацыю.

Інтэрвьюёры Радыё Свабоды таксама сцьвярджаюць, што СОБР пад камандаваньнем Паўлічэнкі выязджаў ваяваць у Чачэнію і пасьля таго, як зьнік Зьміцер Завадзкі. Так, у пачатку сьнежня 2000 году, пасьля таго як зьнялі ў лістападзе з пасады старшыні КГБ Мацкевіча й генэральнага пракурора Бажэлку, які расьсьледаваў дзейнасьць СОБРу, гэтая частка была часова расфармавана. Ейныя салдаты пад камандаваньнем таго самага Паўлічэнкі, сцьвярджаюць Угляніца й Жарнасек, зноў выязджалі ў Чачэнію для вядзеньня баявых дзеяньняў.