Улада ўзяла курс на ўціск Саюзу беларускіх пісьменьнікаў :: Хартыя'97 :: Навiны

"Высокія чыноўнікі ўзялі курс на задушэньне Саюзу беларускіх пісьменьнікаў, не задумваючыся над тым, як выглядае наша краіна ў вачох усіх інтэлектуалаў сьвету". Такая заява зроблена ў лісьце, які накіравалі прэм`ер-міністру Генадзю Навіцкаму й віцэ-прэм`еру Ўладзімеру Дражыну вядомыя беларускія літаратары Янка Брыль, Святлана Алексіевіч, Генадзь Бураўкін, Сяргей Законьнікаў, Рыгор Барадулін, Анатоль Вярцінскі і Ўладзімер Арлоў.

У лісьце зазначаецца, што прадстаўнікі ўлады "стала падкрэсьліваюць свой клопат аб стане духоўнасьці ў краіне. Аднак, на жаль, словы не заўсёды супадаюць са справай. Пэнсіі й ганарары дзеячоў літаратуры й мастацтва мізэрныя, матэрыяльная база культуры не атрымлівае дастатковага фінансаваньня. Творцы духоўных каштоўнасцяў, захавальнікі культурнай спадчыны, якой па праву ганарацца беларусы, падчас паміраюць, так і не дачакаўшыся ад дзяржавы заслужанай паўнацэннай дапамогі. Творчыя саюзы страчваюць дзяржаўную падтрымку".

Аўтары ліста нагадваюць, што ў 1997 годзе "валявым актам СБП быў пазбаўлены маёмасьці" - будынкаў паліклінікі Літаратурнага фонду й Дому літаратараў, што былі набытыя ў адпаведнасці з заканадаўствам на адлічэньні ад ганарараў за кнігі, напісаныя айчыннымі літаратарамі. Нягледзячы на тое, што ў адпаведнасьці са статутам СБП ягоная ўласнасьць ня можа быць прыватызаваная і адчужаная, дзяржава адабрала яе ў літаратараў і ўзамен дала абяцаньне, што фінансаваньне Саюзу й ягонай статутнай дзейнасьці будзе ажыцьцяўляцца з бюджэту. "Аднак 3 ліпеня 2001 года пералічэньне сродкаў Міністэрствам фінансаў было спынена, хаця размова ідзе аб сумах, непараўнальных з прыбыткам, які прыносіць краіне забраная ў пісьменьнікаў уласнасьць", - гаворыцца ў лісьце.

Літаратары заклікаюць кіраўнікоў урада "аднавіць справядлівасьць" і "строга выконваць узятыя на сябе абавязацельствы".