Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Кіраўнік працоўнай групы Парлямэнцкай асамблеі АБСЭ па Беларусі Ута Цапф адмовілася даваць якія-небудзь прагнозы адносна таго, якое рашэньне па выніках ейнага візыту ў Менск можа быць прынятым адносна Беларусі на паседжаньні Сталага камітэту Парлямэнцкай асамблеі АБСЭ 21 лютага ў Вене. “Нашая задача – толькі даць справаздачу, рашэньне будзе прымаць Сталы камітэт, - заявіла сп.Цапф на выніковай прэсавай канфэрэнцыі ў Менску 5 лютага. – Існуюць розныя меркаваньні сярод 55 краінаў, прадстаўленых у ПА АБСЭ, і таму прадугадаць вынікі галасаваньня – усё адно, што гадаць на каве”,- паведамляе БелаПАН.
Журналіста закрытай уладамі гарадзенскай незалежнай газэты “Пагоня” Паўла Мажэйку 4 лютага ў чарговы раз выклікалі ў пракуратуру Гарадзенскай вобласьці. Як паведамляе ПЦ “Вясна”, галоўным чынам сьледчага па асабліва важкіх справах Алега Калевіча цікавіла, дзе знаходзіцца рэдактар “Пагоні” Мікалай Маркевіч. У канцы допыту сьледчы ўручыў Паўлу Мажэйку позву на 14 лютага і папярэдзіў, што адносна яго будзе прад’яўленае абвінавачаньне ў крымінальным злачынстве. Паводле ягоных словаў, хутчэй за ўсё, журналіста абвінавацяць у парушэньні артыкула 367 Крымінальнага кодэксу РБ (паклёп у дачыненньні Прэзыдэнта Рэспублікі Беларусь). Ня выключана, што такое самае абвінавачаньне будзе прад’яўленае і адносна рэдактара “Пагоні” Мікалая Маркевіча.
Аляксандар Лукашэнка заявіў аб тым, што ён не задаволены становішчам справаў на Беларускай чыгунцы. Асноўнай прычынай такога становішча зьяўляецца “неэффективное и неудовлетворительное руководство отраслью, целый ряд руководителей дороги погрязли в злоупотреблениях и решали за счет государства свои личные проблемы”, аб чым заявіў беларускі лідэр 5 лютага на нарадзе з кіраўніцтвам Беларускай чыгункі. Паводле ягоных словаў, праведзеныя пракуратурай і Камітэтам дзяржкантролю праверкі арганізацыі БЧ выявілі “серьезнейшие упущения и даже преступные действия руководителей дороги”.
Увядзеньне ліцэнзаваньня сацыяльных дасьледаваньняў прывядзе да закрыцьця незалежных дасьледчыцкіх цэнтраў у Беларусі. Пра гэта ў інтэрвію БелаПАН заявіў кіраўнік Незалежнага інстытуту сацыяльна-эканамічных і палітычных дасьледаваньняў Алег Манаеў. Аб намерах увесьці ліцэнзаваньне сацыяльных дасьледаваньняў у Беларусі паведамляецца ў лісьце, накіраваным з Адміністрацыі прэзыдэнта ў навукова-дасьледчыцкія арганізацыі краіны – Беларускі дзяржаўны ўнівэрсітэт, Інстытут сацыялёгіі Нацыянальнай акадэміі навук Беларусі, беларускае таварыскае аб’яднаньне “Сацыялягічнае таварыства”.
Віцэ-прэм’ер ураду Ўладзімер Дражын агучыў на калегіі Міністэрства культуры дырэктыву Аляксандра Лукашэнкі, які абавязаў установы культуры шукаць пазабюджэтныя крыніцы фінансаваньня з тым, каб павялічыць самаакупляемасьць з 10 да 30 адсоткаў. У якасьці прыкладу згадвалася Міністэрства адукацыі, дзе самаакупляемасьць дайшла ўжо да 36 адсоткаў. Паводле словаў Дражына, Міністэрства культуры прасіла ў дзяржавы на гэты год 17 млрд. рублёў, але атрымала пакуль толькі 2,5 млрд.
Дзеяньне папраўкі Джэксана-Вэніка, уведзенай у 1974 годзе ў сувязі з дыскрымінацыяй габрэяў у СССР, павінна распаўсюджвацца і на сёньняшнюю Беларусь. Пра гэта заявіў кіраўнік Сусьветнай арганізацыі беларускіх габрэяў Якаў Гутман.
У Міністэрстве культуры прынятае рашэньне аб’яднаць часопіс “Мастацтва” і газэту “Культура”. Як сьцьвярджае Радыё Свабода, робіцца гэта дзеля скарачэньня выдаткаў і ўзмацненьня кантролю над выданьнямі. Мяркуецца, што кіраваць новым холдынгам пад назовам “КіМ” будзе Ліліана Анцух, а сёньняшнія рэдактары часопісу й газэты Аляксей Дудараў і Людміла Крушынская стануць ейнымі намесьнікамі. Чакаецца значнае скарачэньне штатаў у абодвух выданьнях.
Расейскі віцэ-прэм’ер Віктар Хрысьценка заявіў, што на паседжаньні рады дырэктараў ААТ “Газпром” не абмяркоўвалася адмова ад праекту будаўніцтва газапроваду ў абход Украіны праз тэрыторыю Польшчы. Віктар Хрысьценка, які зьяўляецца членам рады дырэктараў кампаніі, заявіў аб гэтым у інтэрвію інфармацыйнаму агенцтву “Новости”. Раней паведамлялася, што другі член рады дырэктараў “Газпрома”, Барыс Фёдараў, падчас тэлефоннай канфэрэнцыі з інвэстарамі, сьцьвярджаў, што рада дырэктараў нібыта прыняла рашэньне адмовіцца ад праекту будаўніцтва газапроваду ў абход Украіны па тэрыторыі Польшчы.
Летась беларускі ўрад плянаваў рэфармаваньне 150 прадпрыемстваў рэспубліканскай уласнасьці. На 122 прадпрыемствах працоўныя калектывы адмовіліся мяняць статус прадпрыемстваў. На базе 23 прадпрыемстваў рэспубліканскай уласнасьці створаныя акцыянэрныя таварыствы, 4 арэндныя прадпрыемствы пераўтвораныя ў адкрытыя акцыянэрныя таварыствы, а 18 прадпрыемстваў вярнулі арэндаваную дзяржмаёмасьць арэндадаўцам. У рэспубліканскай уласнасьці зараз засталося 22 арэндныя прадпрыемствы, прычым у 10 зь іх тэрміны дамоваў арэнды ўжо сышлі.
Украінскі парлямэнт у аўторак падтрымаў дэпутацкі запыт да генэральнага пракурора адносна прэзыдэнта Ўкраіны Леаніда Кучмы, былога міністра Анатоля Лобава й народнага дэпутата Яфіма Зьвягільскага.
Старшыня дэлегацыі Эўрапарлямэнту па Беларусі, Украіне й Малдове Ян Віерсма й ягоныя намесьнікі – Ленарт Сакрэдэус і Элізабэт Шрэдтэр – даслалі адказ на зварот у гэтую эўрапейскую структуру жонак рэпрэсаваных беларускіх палітыкаў – Людмілы Карпенкі, Ірыны Красоўскай, Сьвятланы Завадзкай, Вольгі Захаранкі, Зінаіды Ганчар, Тацяны Клімавай. “Мы б хацелі запэўніць Вас, -- гаворыцца ў лісьце дэпутатаў Эўрапарлямэнту, -- што будзем працягваць выказваць наш занепакой адносна лёсу Вашых мужоў і адносна парушэньняў правоў чалавека ў Беларусі. На жаль, мы не атрымалі адказу на наш ліст да сп.Лукашэнкі, і мы таксама накіруем яму копію гэтага ліста. Вы будзеце ведаць, што Эўрапейскі Парлямэнт надае большую важкасьць разьвіцьцю фундамэтальных каштоўнасьцяў свабоды, дэмакратыі і ўлады закону. Мы маем намер аказваць гэты ўціск на ўрад Беларусі і надалей, і мы будзем падтрымліваць кантакты з Вамі і з усімі іншымі, і працаваць на тое, каб адбыліся зьмены ў Вашай краіне”.
Няпэўнасьць мандату Кансультатыўна-назіральнае групы АБСЭ ў Беларусі – асноўная праблема ва ўзаемаадносінах краіны з эўрапейскімі структурамі. Пра гэта 4 лютага ў Менску на сустрэчы з кіраўніцтвам “савету рэспублікі” заявіла кіраўнік адмысловай працоўнай групы па Беларусі Парлямэнцкай асамблеі АБСЭ Ута Цапф. “Пераемнік спадара Віка на пасадзе кіраўніка місіі гатовы прыступіць да працы, але абмеркаваньне будучыні місіі – гэта ня толькі пытаньне акрэдытацыі Эбэрхарда Хайкэна, але і абмеркаваньне мандату КНГ, -- адзначыла спадарыня Цапф. – Я лічу, што гэта першая праблема, якую неабходна вырашыць, перш чым казаць аб інтэграцыі Беларусі ў эўрапейскую супольнасьць і пашырэньне дыялёгу”.
“Пасьля элегантнай перамогі на выбарах Лукашэнка пачаў генэральную прыборку”, -- так назваў свой артыкул Маркус Венэр, маскоўскі карэспандэнт “Frankfurter Allgemeine”, які першым з эўрапейскіх журналістаў паведаміў чытачам аб існаваньні ў Беларусі “эскадронаў сьмерці”. Як піша журналіст, за чатыры апошнія месяцы беларускі дыктатар робіць усё, што яму прыйдзе ў галаву: саджае за краты кіраўнікоў буйных прадпрыемстваў, імкнецца нават “зачысьціць” місію АБСЭ ў Менску. Паводле словаў старшыні парлямэнцкай працоўнай групы АБСЭ Уты Цапф, усе гэтыя ўчынкі сьведчаць аб верагоднасьці абвастрэньня адносінаў паміж Захадам і Беларусяй. Сама сытуацыя, па сутнасьці, нагадвае “халодную вайну”.
Рада дырэктараў ААТ “Газпром” на паседжаньні ў панядзелак прыняла рашэньне павялічыць магутнасьць газапроваду “Ямал-Эўропа” і адмовілася ад праекту будаўніцтва газапроваду ў абход Украіны па тэрыторыі Польшчы. Аб гэтым, як перадае “Интерфакс”, паведаміў падчас тэлефоннай канфэрэнцыі з інвэстарамі сябра рады дырэктараў “Газпрома” Барыс Фёдараў.
Прэзыдэнт прафсаюзу металістаў Нямеччыны Клаус Цвікель накіраваў ліст да Аляксандра Лукашэнкі, у якім гаворыцца наступнае: “Ад імя прафсаюзу IG Metall выказваю пратэст супраць умяшальніцтва дзяржавы ў дзейнасьць прафсаюзаў Рэспублікі Беларусь, і, у прыватнасьці, супраць новых спробаў пазбаўленьня беларускіх прафсаюзаў іх фінансавай асновы. Зьмена сыстэмы збору прафсаюзных членскіх унёскаў у нашым разуменьні зьяўляецца элементам палітычнай стратэгіі па аслабленьні прафсаюзаў. Мы будзем сачыць за далейшым разьвіцьцём падзеяў у Рэспубліцы Беларусь, і будзем інфармаваць свой урад, камісію Эўразьвязу і Міжнароднай арганізацыі працы аб любых антыпрафсаюзных дзеяньнях беларускіх уладаў”.
Спад плацежаздольнага попыту сельскагаспадарчых спажыўцоў рэспублікі, пычынаючы з ІV кварталю мінулага году, прывёў да рэзкага зьніжэньня выпуску й пастаўкі на ўнутраны рынак фосфарных угнаеньняў, а затым і да спыненьня вытворчасьці дадзеных угнаеньняў. З-за незапатрабаванасьці на ўнутраным рынку Беларусі фосфарных угнаеньняў, завод ня здолеў забясьпечыць своечасовыя разьлікі за асноўную сыравіну (апаціт), што завозіцца па імпарту з Расеі, што прывяло да зрыву ягоных рытмічных паставак. Паводле дадзеных расейскага ААТ “Апатит”, пазыка Гомельскага хімзаводу за адгружаную яму сыравіну складае больш за $2,7 млн. У той самы час запазычанасьць спажыўцоў за адгружаныя фосфарныя ўгнаеньні па стану на 25 студзеня склала каля 1 млрд. рублёў.
Афіцыйны візыт у Малдову прэзыдэнта Беларусі Аляксандра Лукашэнкі адбудзецца ў канцы лютага. Як паведамілі карэспандэнту "ИНТЕРЛИК" у амбасадзе Рэспублікі Беларусь у Кішэнёве, дакладная дата ягонага прыезду ў Малдову будзе вызначаная да канца гэтага тыдня. Плянуецца, што ў Кішэнёве Ўладзімер Варонін і Аляксандар Лукашэнка абмяркуюць шырокі спэктар пытаньняў, датычных разьвіцьця і ўмацаваньня двухбаковых гандлёва-эканамічных стасункаў.
Тры новыя памежныя заставы зьявяцца сёлета на ўчастку мяжы Польшчы з Украінай і Беларусяй. Пра гэта паведаміла “Газэта выборча” са спасылкаю на камэнданта Надбужанскага аддзелу памежнай варты падпалкоўніка Марэка Доміняка. Сёньня на 460-кілямэтровым участку мяжы з Украінай, які ахоўваюць падразьдзелы НОПС, знаходзіцца 15 памежзаставаў. Тры зь іх зьявіліся летась, але па стандартах ЭЗ гэтага мала. Кожная з трох памежзаставаў будзе ахоўваць 25-кілямэтровы ўчастак мяжы, што адказвае патрабаваньням ЭЗ.
