Леванеўскi займаецца праваабарончай дзейнасцю нават у калонii :: Хартыя'97 :: Навiны

Палiтзняволены Валерый Леванеўскi арганiзаваў у калонii праваабарончы цэнтр. Пра гэта паведамiў ПАГОНI ягоны сын Уладзiмiр Леванеўскi.

- Ён папрасiў даслаць юрыдычную лiтаратуру i цяпер праводзiць кансультацыi зняволеных, - гаворыць Уладзiмiр Леванеўскi.

Першай рэакцыяй кiраўнiцтва калонii на праваабарончую дзейнасць Леванеўскага стаў перавод яго ў iншы атрад.

- Яго размеркавалi ў атрад пад нумарам 3, а цяпер нечакана перавялi ў iншы. Звычайна, калi ўжо размеркавалi ў атрад, то там зняволены i адбывае пакаранне да канца. Дзеля таго, каб змянiць атрад, патрэбны паважныя падставы. Аднак бацьку так i не патлумачылi, чаму яго перавялi, - гаворыць Уладзiмiр.

Нагадаем, што лiдэры гарадзенскiх прадпрымальнiкаў, Валерый Леванеўскi i Аляксандр Васiльеў, прызнаны вiнаватымi ў публiчнай знявазе прэзiдэнта Аляксандра Лукашэнкi. Суд прыгаварыў кожнага з iх да двух гадоў пазбаўлення волi ў калонii агульнага рэжыму. Падставай для гэтага стала ўлётка з заклiкам прыняць удзел у першатравеньскiм мiтынгу пратэсту. Вершык-частушка, размешчаны на ўлётцы, суд палiчыў зняважлiвым для Аляксандра Лукашэнкi.
Минск, Белоруссия lllll