Беларусы пратэстуюць на саміце «Эўразьвяз-Расея» :: Хартыя'97 :: Навiны

25 лістапада ў галяндзкім горадзе Гаага адбыўся пікет, арганізаваны Беларускай Уніяй. Акцыя была прымеркавана да саміту "Эўразьвяз - Расея", які праходзіў гэтым днём у палацы Ridderzaal Binnenhof. Удзел у ім прымаў расейскі прэзідэнт У.Пуцін. Акцыя праходзіла пад лёзунгам "Расея! Стоп падтрымцы беларускага дыктатара!".

З дазволу мясцовай паліцыі пікет праходзіў каля галоўнага ўваходу рэзідэнцыі. Вялікую зацікаўленасьць акцыя пратэсту выклікала ў сусьветных сродкаў масавай інфармацыі, якія ў гэты дзень асьвятлялі праходзячы саміт. Да пікетоўцаў падыходзілі ды й бралі інтэрвію тэлежурналісты нямецкага тэлеканала ARD, галяндзкага, французскага ды ангельскага ТБ. Акром таго журналісты газэтаў. Трохі пазьней стала вядома аб паказаным пра акцыю рэпартажы па навіноваму тэлеканалу CNN.

Пікетоўцы трымалі ў руках нацыянальныя сьцягі, плякаты рознага зьместу, раздавалі ўлёткі з інфармацыяй аб зьніклых з дапамогай рэжыму людзях.

У пікеце прынялі ўдзел сябры БЭЗу, жонка зьніклага журналіста Д.Завадзкага Сьвятлана і прадстаўнік Эўрапейскай кааліцыі "Свабодная Беларусь" В.Стужынская. Таксама прыймалі ўдзел прадстаўнікі ўкраінскай дыяспары, якія ў гэты дзень ладзілі акцыю пратэсту ля расейскай амбасады ў Гаазе.

Апошняя частка акцыі прайшла ў выглядзе шэсьця вакол рэзідэнцыі й выклікала дадатковую зацікаўленасьць як з боку мінакоў гэтак і збоку журналістаў расейскіх тэлеканалаў ОРТ і РТР.
Минск, Белоруссия