Пракуратура папярэджвае грамадзкіх актывістаў :: Хартыя'97 :: Навiны

Гарадзенец Франц Аўдзей атрымаў афіцыйнае папярэджаньне пракуратуры Гарадзенскага раёну за дзейнасьць ад імя грамадзкага руху “Воля народу”. Такія ж папярэджаньні атрымалі актывісты і ў іншых рэгіёнах Беларусі.

Пракуратура спасылаецца на высновы Міністэрства юстыцыі, якое лічыць, што надрукаваныя ў газэце “Народная воля” матэрыялы пра грамадзкую ініцыятыву “Воля народу” не адпавядаюць патрабаваньням закону. У прыватнасьці, Ф. Аўдзея папярэдзілі пра адказнасьць за дзейнасьць ад імя незарэгістраванай арганізацыі. У выпадку працягу падобнай дзейнасьці, яго абяцаюць прыцягнуць да адміністрацыйнай адказнасьці.

У той жа дзень такое ж папярэджаньне ад мастоўскай пракуратуры атрымаў грамадзкі актывіст Язэп Палубятка. Цікава, што ў тэксьце дакумэнту ў адным месцы пра “Волю народу” напісана, як пра грамадзкую ініцыятыву, а ў іншым — як пра грамадзкае аб’яднаньне. 30 траўня берасьцейскай пракуратурай быў папярэджаны праваабаронца, кіраўнік Берасьцейскага прадстаўніцтва БХК Ігар Маслоўскі, прозьвішча якога таксама прысутнічала ў публікацыі “Народнай волі”.

Ф. Аўдзей лічыць, што ціск на актывістаў грамадзкага руху наўпрост зьвязаны з будучай кампаніяй выбараў прэзыдэнта Беларусі. Таму ўлады вынішчаюць усе спробы стварыць непадпарадкаваныя ім ініцыятывы грамадзяна, паведамляе www.belngo.info.
Минск, Белоруссия