Зьняволеныя падтрымоўваюць Валеры Леванеўскага :: Хартыя'97 :: Навiны

Сёньня 8-мы дзень галадоўкі лідара Агульнанацыянальнага страйкаму прадпрымальнікаў, сябра Рады грамадзянскіх ініцыятываў “Свабодная Беларусь” Валерыя Леванеўскага ў Івацэвіцкай калёніі. Напярэдадні жонцы палітвязьня Марыне Леванеўскай патэлефанаваў былы вязень івацэвіцкай калёніі, які днямі вызваліўся па амністыі. Ён сказаў, што ў калёніі ведаюць пра галадоўку Валерыя Леванеўскага і падтрымліваюць.

Зараз Валеры Леванеўскі знаходзіцца ў мэдычнай частцы калёніі. Лідар прадпрымальнікаў дамагаецца разгляду сваіх скаргаў і патрабуе адстаўкі кіраўніка Дэпартамэнту выкананьня пакараньняў Уладзіміра Коўчура.

Нагадаем, Валер Леванеўскі летась быў асуджаны на два гады калёніі за паклёп на Аляксандра Лукашэнку. Ва ўлётцы, якую ён распаўсюдзіў сярод прадпрымальнікаў, было напісана: “Прыйдзі і скажы, што ты супраць таго, каб нехта за твой кошт ездзіў ў Аўстрыю адпачываць, катацца на лыжах, жыць у сваё задавальненьне”. Арганізацыя “Міжнародная амністыя” абвясьціла Валера Леванеўскага вязьнем сумленьня.
Минск, Белоруссия lllll