Сяргея Скрабца могуць перавесьці ў Менск :: Хартыя'97 :: Навiны

Актывіста беларускай апазіцыі, былога дэпутата і лідара групы “Рэспубліка” Сяргея Скрабца могуць перавесьці зь Берасьця ў Менск. Такое разьвіцьцё падзеяў лічыць верагодным адвакат палітвязьня Міхаіл Хоміч. Сяргей Скрабец ужо 38 дзень працягвае галадоўку ў Берасьцейскім сьледчым ізалятары. Апазыцыянэр пратэстуе супраць арышту і абвінавачаньняў на свой адрас, якія лічыць беспадстаўнымі. Былога парлямэнтара абвінавачваюць па двух артыкулах Крымінальнага кодэксу — падрыхтоўка да злачынства і хабарніцтва.

Адвакат Міхаіл Хоміч і сьледчы Берасьцейскай пракуратуры Андрэй Ліванаў 20 чэрвеня пацьвердзілі “Радыё Свабода”, што справу былога парлямэнтара надалей будзе весьці не Берасьцейская абласная, а рэспубліканская пракуратура. Чым выклікана такое рашэньне, яны не ведаюць.

Як паказвае практыка, звычайна з пераводам справы ў рэспубліканскую пракуратуру асобу, якая падазраецца ў нейкіх парушэньнях заканадаўства, звычайна пераводзяць у Менск. Адвакат Міхаіл Хоміч думае, што і цяпер усё адбудзецца гэткім чынам:

"Відавочна будзе пераведзены ў Менск. Але ж гэта не адразу робіцца – пакуль паперы прыйдуць, пакуль адпаведная пастанова будзе. Думаю, дзесьці напрыканцы тыдня ўсё будзе вядома. Максымум, напачатку наступнага тыдня", -- паведаміў юрыст.

Малодшы брат арыштаванага палітыка Аляксандар Скрабец, які першапачаткова праходзіў як саўдзельнік справы старэйшага брата, сёньня паведаміў, што апошнім часам яго не выклікаюць у справе дачы хабару. Аднак сьледзтва вяртаецца да ранейшай справы братоў – атрыманьня крэдытаў ад дзяржавы для стварэньня прадпрыемства "Белбабаеўскі", якое зьбіралася выпускаць салодкую прадукцыю, альтэрнатыўную і больш танную за вытворчасьць менскай "Камунаркі" і гомельскага "Спартака".
Минск, Белоруссия