Анжаліку Борыс вызвалілі :: Хартыя'97 :: Навiны

Лідэр Саюза палякаў Беларусі Анжаліка Борыс была вызваленая сёння ўначы толькі пасля таго, як у наркадыспансеры ў Гародні ў яе былі ўзятыя аналізы на наяўнасць наркатычных рэчываў у крыві. Аб гэтым прэс-цэнтру Хартыі`97 паведаміў актывіст Саюза палякаў Беларусі Анджэй Пачабут. Па яго словах, аналіз крыві быў узяты таксама ў актывістаў СПБ Тэрэзы Селівончык і Анджэя Лісоўскага, якія суправаджалі Борыс.

Аўтамабіль, у якім ехала Анжаліка Борыс, быў канфіскаваны нібы для далейшай праверкі.

Нагадаем, што ў нядзелю на памежным пераходзе Прывалка на поўначы Гарадзенскага раёна быў затрыманы аўтамабіль Аudi, у якім вярталася з Літвы Анжаліка Борыс. Мытнікі пачалі агляд машыны і, раскруціўшы люстэрка, знайшлі ў ім пакуначак з невядомым парашком.

Борыс паведаміла, што машыну даглядалі некалькі разоў, выкарыстаўшы пад канец нават сабаку. На конт знойдзенага парашка Борыс заявіла, што гэта правакацыя. Кіраўнік Саюза палякаў вярталася з Вільні са сваімі калегамі з паседжання Еўрапейскага саюза паланійных арганізацый.

Указанне на асабісты агляд Анжалікі Борыс даваў начальнік Гарадзенскай рэгіянальнай мытні Юрый Сенько.