Беларусы і кубінцы ствараюць «парламент» Руху недалучэння :: Хартыя'97 :: Навiны

Беларусь і Куба абмеркавалі перспектывы рэфармавання Руху недалучэння (РН), паведамілі "Інтэрфаксу" у міністэрстве замежных спраў Беларусі. "У Менску на сустрэчы кіраўнік МЗС Беларусі Сяргей Мартынаў і старшыня Нацыянальнай Асамблеі народнай улады Кубы Рыкарда Аларкон дэ Кесада абмяняліся меркаваннямі па пытаннях далейшага рэфармавання РН, стварэння і функцыянавання міжпарламенцкай структуры дадзенай арганізацыі", – паведаміў МЗС.

Там таксама праінфармавалі, што на сустрэчы ў беларускім МЗС "была нададзеная ўвага шчыльнаму ўзаемадзеянню двух краін на міжнароднай арэне ".

"Бакі выказалі задавальненне дасягнутым узроўнем міжпарламенцкага супрацоўніцтва", – паінфармавалі ў МЗС.

"Кубінскі бок падкрэсліў выключную ролю Беларусі як адзінай еўрапейскай краіны ў Руху недалучэння (РН). Р. дэ Кесада яшчэ раз пацвердзіў намер Кубы аказваць усебаковую падтрымку Беларусі на міжнароднай арэне", – адзначылі ў знешнепалітычным ведамстве.

У МЗС нагадалі, што з 28 кастрычніка па 1 лістапада ў Беларусі з афіцыйным візітам знаходзіцца кубінская парламенцкая дэлегацыя.