Анджэя Лісоўскага выклікалі на допыт :: Хартыя'97 :: Навiны

Супрацоўнікі міліцыі ў цывільным, якія дзяжурылі сёння каля дому, дзе пражывае актывіст Саюза палякаў Беларусі Анджэй Лісоўскі, не сталі праводзіць у яго кватэры ператрус. Як толькі да дому прыбылі лідэр Саюза палякаў Анжаліка Борыс і актывісты СПБ міліцыянты селі ў аўтамабілі і з`ехалі. Аднак Анджэй Лісоўскі атрымаў павестку з`явіцца заўтра раніцай на допыт у Гарадзенскую рэгіянальную мытню. Аб гэтым прэс-цэнтру Хартыі’97 паведаміў актывіст СПБ Анджэй Пачабут.

Нагадаем, што Анджэй Лісоўскі знаходзіўся ў адным аўтамабілі з Анжалікай Борыс, калі яна была затрыманая на мяжы з Літвой 29 кастрычніка. Затрыманне рабілася на падставе таго, што ў аўтамабілі Борыс быў знойдзены пакет з невядомым парашком. Сёння Гарадзенская рэгіянальная мытня ўзбудзіла крымінальную справу па факце кантрабанды наркотыкаў. Па паведамленні Дзяржаўнага мытнага камітэта (ДМК) Беларусі, "невядомым парашком" аказаўся гераін.

Нагадаем, што Борыс яшчэ падчас затрымання назвала тое, што адбываецца, "правакацыяй беларускіх праваахоўных органаў" і заявіла, што не мае да пакета ніякага дачынення.