Ніно Бурджанадзэ: Шэварнадзэ быў не такім як Лукашэнка :: Хартыя'97 :: Навiны

Спікер парламента Грузіі Ніно Бурджанадзэ лічыць, што сітуацыя ў Грузіі да рэвалюцыі непараўнальная з сённяшняй сітуацыяй у Буларусі. “Шэварнадзэ быў лідэрам іншага тыпу, ніж ваш сённяшні прэзідэнт. У Грузіі да “рэвалюцыі руж” былі вельмі сур’ёзныя і складаныя праблемы. Была вялізная хваля карупцыі, краіна практычна не кіравалася, было шмат беззаконня. Але ў прынцыпе ў Грузіі фактычна не было ніякіх праблем з прэсай, са свабодай слова і няўрадавымі арганізацыямі. Палітычныя лідэры ў нас былі абсалютна свабодныя, апаненты ўлады выступалі абсалютна свабодна. Сітуацыя ў гэтым накірунку была нармалёвай...” – заявіла спікер парламента Грузіі Ніно Бурджанадзэ ў інтэрв’ю “Народнай воле”.

– Спадарыня Бурджанадзэ, грузінская дэмакратычная рэвалюцыя – адна з самых яркіх на постсавецкай прасторы. Грузінская апазіцыя прыйшла да ўлады імкліва і без ваганняў прынялася мадэрнізаваць палітычную сістэму краіны. У Беларусі дэмакратычная апазіцыя расцягнула барацьбу за ўладу на доўгія гады, і, здаецца, канца і краю ёй няма. З пазіцый досведу грузінскай дэмакратыі, што бы Вы параілі беларускім дэмакратам для поспеху?

– Вы ведаеце, раіць наогул вельмі складана, бо кожны народ выбірае сам, які шлях яму прайсці, і кожны палітычны лідэр сам выбірае, як дзейнічаць, улічваючы інтарэсы свайго народа. Таму мне складана даваць нейкія рэкамендацыі. Адно я ведаю дакладна – беларускі народ сапраўды заслужыў, каб у Беларусі было дэмакратычны ўрад і краіна стала часткай цывілізаванага дэмакратычнага грамадства. Вядома ж, вельмі важна, каб у Беларусі прайшлі некаторыя дэмакратычныя ператварэнні, і, безумоўна, важна, каб прайшлі яны максімальна мірна.

– Вы бачыце якія-небудзь паралелі паміж Грузіяй часоў Шэварнадзэ і цяперашняй Беларуссю?

– Пэўна, усёткі не, бо Шэварнадзэ быў лідэрам іншага тыпу, чым ваш сённяшні прэзідэнт. У Грузіі (да “рэвалюцыі руж”) былі вельмі сур`ёзныя і складаныя праблемы. Была вялізная хваля карупцыі, краіна практычна не кіравалася, было шмат беззаконня. Але ў прынцыпе ў Грузіі фактычна не было ніякіх праблем з прэсай, са свабодай слова і няўрадавымі арганізацыямі. Дэмакратычныя структуры сур`ёзна працавалі ўжо ў то час. Таму, нягледзячы на тое, што я шмат у чым апаную Шэварнадзэ, было бы несправядліва абвінавачваць яго ва ўшчымленні дэмакратычных інстытутаў і свабоды слова. Палітычныя лідэры ў нас былі абсалютна свабодныя, апаненты ўлады выступалі абсалютна свабодна. Сітуацыя ў гэтым накірунку была нармалёвай...

– Па Вашых ацэнках, як хутка прыйдзе час, калі ў Вас з’явіцца магчымасць, а галоўнае, жаданне нанесці афіцыйны візіт у Беларусь у якасці кіраўніка прадстаўніцкай улады дэмакратычнай Грузіі?

– Складана зараз пра гэта казаць. Я не думаю, што ваш сённяшні прэзідэнт будзе рады бачыць мяне ў Беларусі. Я думаю, што нам у прынцыпе не аб чым будзе размаўляць, таму што мы хутчэй за ўсё размаўляем на розных мовах. Мы не зразумеем адзін аднаго. У нас проста-такі розныя каштоўнасці, розныя погляды на тое, як павінна развівацца дэмакратычная і нармальная дзяржава. Да беларускага народа ў мяне самыя добрыя і самыя шчырыя пачуцці. Я шчыра вам жадаю росквіту, дабра. І я ўпэўненая ў тым, што Беларусь у хуткім часе стане годным сябрам еўрапейскай сям`і...