В.а. начальніка калоніі: Сустрэчы Казуліна з адвакатам спыненыя з-за стану здароўя падабароннага :: Хартыя'97 :: Навiны

Адвакат экс-кандыдата ў прэзідэнты, палітвязня Аляксандра Казуліна Ігар Рынкевіч атрымаў адказ з выпраўленчай калоніі №3 на пададзены ім адвакацкі запыт. У гэтым дакуменце, падпісаным часовым выканаўцай абавязкаў начальніка калоніі №3 маёрам Р.Прыймаком, паведамляецца: “20 кастрычніка 2006 года асуджаны Казулін А.У. абвясціў галадоўку і ўвесь час знаходзіцца пад назіраннем лекара і на сённяшні дзень (22 лістапада – заўв. аўт.) страціў каля 17,5 кг вагі, АЦ – 105/90 мм.рт.сл. Значная страта вагі і стан здароўя патрабуюць яго суправаджэння па тэрыторыі ўстановы, а абавязковая прысутнасць медыцынскага працаўніка робіць немагчымасць прыватнасці сустрэчы.

Галадоўка, якая праводзіцца асуджаным Казуліным А.У., выклікае заклапочанасць у адміністрацыі за яго стан здароўя, накладвае дадатковую адказнасць на кіраўніцтва калоніі за забеспячэнне правапарадку ў дадзены перыяд.

Сустрэчы асуджанага Казуліна А.У. з адвакатам спыненыя выключна праз стан здароўя падабароннага”.

Варта адзначыць, што некалькі дзён таму такі ж ліст з калоніі атрымала дачка А.Казуліна Юлія ў адказ на яе запыт аб правамернасці адмовы сустрэчы з адвакатам. Аналагічны адказ атрымаў Ігар Рынкевіч з Дэпартамента выканання пакаранняў.

Нагадаем, што Аляксандр Казулін галадае з 20 кастрычніка, гэта значыць ужо 41 дзень. За 8 месяцаў зняволення Аляксандр Казулін страціў 30 кілаграмаў вагі. Асноўнае патрабаванне галадоўшчыка – разгляд сітуацыі ў Беларусі ў Радзе Бяспекі ААН.