Ірына Казуліна сустрэлася з амбасадарамі Францыі і Нямеччыны :: Хартыя'97 :: Навiны

Жонка экс-кандыдата ў прэзідэнты, палітвязня Аляксандра Казуліна Ірына Казуліна і намеснік старшыні Беларускай сацыял-дэмакратычнай партыі (Грамада) Аляксей Кароль наведалі сёння амбасаду Францыі і Нямеччыны. Кіраўнікі дыппрадстаўніцтваў гэтых краін былі паінфармаваныя аб стане здароўя Аляксандра Казуліна і аб кароткачасовай сустрэчы з ім у калоніі 25 лістапада. Ірына Казуліна перадала дыпламатам просьбу палітвязня аб пастаноўцы пытання аб сітуацыі з правамі чалавека ў Беларусі ў Радзе Бяспекі ААН.

Амбасадары перадалі словы падтрымкі А.Казуліну і яго сваякам, засведчылі, што перададуць гэтую інфармацыю ўрадам сваіх краін, паведаміла прэс-служба экс-кандыдата ў прэзідэнты.

Нагадаем, што краіны Еўразвяза прынялі нядаўна адпаведную рэзалюцыю па Беларусі, якая асуджае практыку парушэння правоў чалавека ў краіне. У рэзалюцыі знайшла адлюстраванне і тэма палітычных пераследаў сяброў апазіцыі. Трэці Камітэт Генеральнай асамблеі ААН таксама прыняў рэзалюцыю, у якой адлюстраванае разуменне сітуацыі з правамі чалавека ў Беларусі.

Аляксандр Казулін галадае ў віцебскай выпраўленчай калоніі ўжо 41 дзень. За 8 месяцаў зняволення ён страціў 30 кілаграмаў вагі. Стан яго здароўя выклікае асцярогу, аднак палітык не збіраецца спыняць галадоўку, пакуль не будзе выкананае яго патрабаванне.