Беларускі МЗС «пашырае колькасць апораў» :: Хартыя'97 :: Навiны

Беларусь не шукае альтэрнатыву расейскім энергарэсурсам, а толькі мае намер іх дыверсіфікаваць, заявіў у Менску на прэс-канферэнцыі міністр замежных спраў Сяргей Мартынаў. “Мы не шукаем альтэрнатыву расейскай нафце і газу – гэта было б, як мінімум, недальнабачна, але мы абавязаныя думаць аб энергетычнай бяспецы, пашыраць колькасць апораў на якіх энергетычная бяспека трымаецца”, – заявіў кіраўнік МЗС Беларусі.

Міністр нагадаў, што на працягу апошніх гадоў у Беларусі зацверджаная і рэалізуецца канцэпцыя энергетычнай бяспекі. “Развіваючы стратэгічнае супрацоўніцтва з Расеяй у энергетычнай вобласці, мы імкнемся шукаць і дадатковыя крыніцы неабходных энергарэсурсаў”, – сказаў С.Мартынаў.

Міністр падкрэсліў, што ў рамках гэтай працы і праходзіла сустрэча прэзідэнтаў Азербайджана, Беларусі і Украіны. “Прэзідэнты прыйшлі да высновы, што ёсць і магчымасці такога ўзаемадзеяння, і патэнцыял узаемадзеяння ў энергетычнай сферы”,– падкрэсліў С.Мартынаў.

Па словах кіраўніка МЗС, падчас 3-баковай сустрэчы абмяркоўваліся пытанні паставак і перапрацоўкі нафты, паставак і транзіту электрычных рэсурсаў і перспектывы супрацоўніцтва ў газавай сферы.

С.Мартынаў таксама падкрэсліў, што супрацоўніцтва Беларусі, Азербайджана і Ўкраіны “можа быць досыць істотным”.