Расея больш не будзе фінансаваць «эканамічны цуд» Лукашэнкі :: Хартыя'97 :: Навiны

“Расея больш не будзе фінансаваць наш беларускі “эканамічны цуд”, – такое меркаванне выказаў БелаПАН кіраўнік аналітычнага цэнтра “Стратэгія” Леанід Заіка, каментуючы ўчорашні саміт кіраўнікоў краін СНД у Менску. “Пуцін у адрозненні ад Ельцына заяўляе аб прыхільнасці эканамічнай, а не палітычнай прывязкі да Расеі іншых краін СНД, – адзначыў аналітык. – Пуцін неаднаразова дэманстраваў, што ў яго інтарэсах і ў інтарэсах Расеі пранікненне расейскага капіталу і дамінаванне на рынках постсавецкай прасторы. Расея будзе сябраваць з тымі, хто лаяльны па дачыненні да Крамля, і запэўненні аб вечным сяброўстве з палітычнага пункту гледжання яго не кранаюць”.

“Унутранай палітыкі краін, якая заснаваная на танных энергарэсурсах, больш не будзе”, – лічыць Л.Заіка. Па яго словах, трохбаковая сустрэча ў Менску прэзідэнтаў Азербайджана, Украіны і Беларусі паказала, што “кожны з іх імкнецца да эканамічнай незалежнасці ад Расеі, і ўсе яны спрабуюць разгуляць энергетычную альянсную карту”. “Аліеву баяцца няма чаго – у яго шмат нафты, а вось Лукашэнку і Юшчанку ёсць над чым задумацца, – лічыць Л.Заіка. – Юшчанка прадэманстраваў, што ён не разбіраецца ў палітычнай сітуацыі – ні ў Беларусі, ні ў Азербайджане, Аліеў паводзіў сябе як усходні мудрэц, а Лукашэнка быў прадказальны”.

Эксперт таксама адзначыў, што “15 год таму СНД задумвалася як адзіная мытная і эканамічная прастора, аднак з гэтага нічога не атрымалася: кожная краіна будуе сваю нацыянальную эканоміку”. “Я лічу, што СНД можа будаваць агульную палітыку толькі ў гуманітарнай сферы, а таксама ў транспартнай і развіцці інфраструктуры”, – сказаў кіраўнік аналітычнага цэнтра.