У Магілёве затрымалі актывістку АГП Крысціну Шацікаву :: Хартыя'97 :: Навiны

Учора ўвечар на аўтавакзале ў Магілёве была затрыманая актывістка Аб’яднанай грамадзянскай партыі, абаронца намётавага мястэчка Крысціна Шацікава. Дзяўчына вярталася дадому з Менска, дзе 27 лістапада прыняла ўдзел у акцыі салідарнасці са Зміцерам Дашкевічам. Яна везла з сабою газеты “Народная воля”, “6 кв.метраў” і “Белорусский вестник”, у якім знаходзілася інфармацыя аб прэзентацыі кнігі “Верам, можам, пераможам!”, прысвечанай акцыям пратэсту супраць фальсіфікацыі вынікаў выбараў, якія адбыліся ў Менску ў сакавіку 2006 года.

Як паведамляе прэс-служба АГП, Крысціну Шацікаву пратрымалі ў міліцыі каля двух гадзін і склалі пратакол канфіскацыі друкаванай прадукцыі. Пасля гэтага дзяўчыну вызвалілі, уручыўшы позву з’явіцца сёння ў 14.00 у Ленінскі РАУС горада Магілёва для “дачы паказанняў”. Крысціна Шацікава не выключае, што пасля складання пратаколу яе справа можа быць перададзеная ў суд.