Польшча чакае ад «Газпрома» бесперабойнай падачы газу :: Хартыя'97 :: Навiны

Польшча чакае ад расейскага газавага манапаліста “Газпрома” прытрымлівання сваіх абавязальніцтваў у сувязі з рызыкай перабояў падачы газу з-за расейска-беларускага канфлікту, заявіў у эксклюзіўным інтэрв`ю “Інтэрфаксу” міністр эканомікі Польшчы Пётр Вазняк.

“Мы не можам згадзіцца з сітуацыяй, калі канфлікт, да якога Польшча не мае дачынення, адбіўся бы нейкім чынам на пастаўках прыроднага газу ў Польшчу”, – падкрэсліў ён. Такая сітуацыя, паводле яго, “непрымальная”.

Міністр адзначыў, што небяспека скарачэння падачы газу спажыўцам захоўваецца, нягледзячы на цёплую зіму.

“Сёлета надвор`е выключна спрыяльнае, – адзначыў ён. – Пэўна, упершыню ў снежні не прыйшлося звяртацца да газавых рэзерваў, і сховішчы запоўненыя газам. Тым не менш рызыка існуе, і мы не можам не патрабаваць прытрымлівання падпісаных намі кантрактаў”.

Ён адзначыў, што Польшча можа павялічыць аб`ём газавых сховішчаў, “але гэта запатрабуе часу, і ў цяперашняй сітуацыі пытанне аб дыверсіфікаванні паставак газу вяртаецца на парадак дня”.