Вярхоўны суд разгледзіць скаргу на Цэнтрвыбаркам :: Хартыя'97 :: Навiны

6 жніўня ў Вярхоўным судзе Беларусі адбудзецца папярэдняя гутарка па скарзе на адмову Цэнтрвыбаркама зарэгістраваць ініцыятыўную групу па зборы подпісаў для занясення змен у працоўнае заканадаўства.

Як паведаміў БелаПАН старшыня ініцыятыўнай групы, лідэр Беларускага прафсаюза працаўнікоў радыёэлектроннай прамысловасці Генадзь Фядыніч, 31 ліпеня з Мінюста прыйшло адпаведнае паведамленне.

Нагадаем, што 24 ліпеня ў Вярхоўны суд накіраваная скарга на пастанову ЦВК з адмовай зарэгістраваць ініцыятыўную групу па зборы подпісаў для занясення змен у працоўнае заканадаўства. Ініцыятыўная група апратэстоўвала высновы Цэнтрвыбаркама пра тое, што сход сябраў ініцыятыўнай групы, які прайшоў 1 траўня 2007 года, нельга лічыць паўнамоцным. Для доказу гэтага былі паўторна сабраныя больш як 300 подпісаў удзельнікаў сходу, якія пацвярджаюць яго легітымнасць.

ЦВК адмовіў у рэгістрацыі ініцыятыўнай групы па зборы подпісаў для занясення змен у працоўнае заканадаўства 26 чэрвеня. Сваё рашэнне камісія матывавала тым, што прадстаўленыя ініцыятыўнай групай праекты законаў супярэчаць Канстытуцыі, закону "Аб нарматыўна-прававых актах" і правілам падрыхтоўкі нарматыўна-прававых актаў.