«Страна для народа»: Семья ликвидатора живет в конюшне! (Фото)

17 лет в деревянном бараке живет семья чернобыльского ликвидатора, бывшего депутата горсовета Геннадия Гаврусева. Дом, который 80 лет назад был красноармейской конюшней, находится недалеко от центра Борисова.

Яшчэ пры жыцьці Генадзь Гаўрусёў, які памер амаль год таму, публічна адмовіўся аплачваць жыроўкі за карыстаньне, як ён пісаў, “трушчобамі, непрыдатнымі для жытла”. Цяпер акцыю супраціву працягвае ягоная сям’я, паведамляе “Радыё Свабода”.

Выгляд двухпакаёўкі на вуліцы Арджанікідзэ, 20, уражвае. Печка, счарнелая ад дыму. Шэрыя, сырыя, перакошаныя сьцены. Калёнка ў суседнім доме. На двары сьмецьце ды прыбіральня. У хаце сустрэлі спадарыня Алена Гаўрусёва з маленькім унукам ды 11-гадовай дачкой Марынай. Дачка мае “букет” хранічных захворваньняў – ад бранхіту да артрыту. Алена Ўладзімераўна гартае папку са шматлікімі адказамі ад інстанцый.

“Асабіста выклікала камісію. Камісія складалася з прадстаўнікоў домакіраваньня і СЭС. Яны зрабілі заключэньне: “Дом адпавядае санітарна-тэхнічным нормам.” Арыгінал у мяне ёсьць. Адказ з жыладдзелу, што ў 2009 будзе рамантавацца страха. А нашто тая страха, калі няма ані сьцен, ані падлогі?! Дзьме з усіх бакоў. Бывала, на ўнутраных вокнах нарастаў сьнег на 5 см. Вада замярзала, а вы ведаеце, што гэта ніжэй нуля. А калі топім, пыл, бруд – няма чым дыхаць. Пасьля кожнага ацяпляльнага сэзону мне даводзіцца рабіць рамонт. У мяне пагніла ўся мэбля. Адзіная надзея – палічаць дом аварыйным, зьнясуць і дадуць хоць нейкае жыльлё...”, - распавядае Алена Гаўрусёва.

“Фізычнае зношваньне складала 61 %... Наконт паляпшэньня жыльлёвых умоў – паведамляем, што Гаўрусёў... знаходзіцца на ўліку тых, хто мае патрэбу ў іх паляпшэньні...” Гэта радкі з даўняга адказу старшыні Барысаўскага райвыканкаму Васіля Дылюка. Адказ на сёньняшні запыт нядаўна атрымаўшага пасаду намесьніка старшыні Юрыя Шэлягіна наступны: “Гэтую сытуацыю я ня ведаю наогул...”

Камэнтар старшыні саюзу “Чарнобыль Беларусі” Аляксандра Валчаніна:

“Гэта адзіны выпадак на ўсю Беларусь, калі жывуць у канюшні 1920 году. Многія чыноўнікі думаюць, што ільготы ды сацыяльныя гарантыі чарнобыльцаў адмененыя. Ёсьць закон, падпісаны, дарэчы, Лукашэнкам, дзе гаворыцца, што ўдзельнікі ліквідацыі карыстаюцца правам першай чаргі на жытло ды карыстаньне жыльлёва-камунальнай гаспадаркай. У Бруселі я ўздымаў гэтае пытаньне перад дэпутатамі Эўразьвязу...”

Запазычанасьць за жыльлё сямейства Гаўрусёвых хутка дасягне мільёну. Яшчэ год таму нябожчык паведаміў службам ЖКГ, што плаціць адмаўляецца. Ягоная жонка Алена таксама кажа, што плаціць не зьбіраецца, бо няма за што. “Гэта мне павінны плаціць, што такое “жыльлё” цягну на сябе...”, - перакананая Алена Гаўрусёва.

Фота "Радыё Свабода"