Гетман NATO ў Еўропе прадказаў фіяска наступу Пуціна на Харкаў

Генерал Кавалі назваў ключавыя чыннік.

Расейскаму войску, якое другі раз з пачатку вайны ўварвалася ў Харкаўскую вобласць, не выстарчыць сіл і сродкаў, каб радыкальна змяніць сітуацыю на гэтым адцінку фронту, упэўнены генерал Крыстафер Кавалі, вярхоўны гетман Аб'яднаных узброеных сіл NATO ў Еўропе.

На ягоную думку, украінскім войскам атрымаецца ўтрымаць пазіцыі, тым больш што неўзабаве ім на дапамогу павінна прыбыць "вялікую колькасць" боепрыпасаў і сістэм СПА блізкага радыусу дзеяння, а таксама "значную колькасць" бранятэхнікі.

У расейскіх падраздзяленняў “няма той колькасці, што неабходная для стратэгічнага прарыву”, сказаў Кавалі на прэс-канферэнцыі ў штаб-кватэры NATO ў Брусэлі пасля сустрэчы кіраўнікоў вайсковых ведамстваў чальцоў альянсу, перадае Reuters.

Больш за тое, у іх няма навыкаў і магчымасцяў для гэтага, каб дзейнічаць у маштабах, неабходных для ператварэння прарыву ў стратэгічную перавагу. У іх ёсць магчымасць дабівацца лакальных поспехаў, і яны ўжо гэта прадэманстравалі. Яны таксама панеслі некаторыя лакальныя страты.

Сітуацыя з пастаўкамі боепрыпасаў УСУ павінна неўзабаве "сур'ёзна палепшыцца", дадаў старшыня Вайсковага камітэта NATO адмірал Роб Баўэр.

Кавалі не падаў звестак аб колькасці расейскіх войскаў на гэтым адцінку фронту. З ацэнкі Джорджа Бароса, аналітыка Інстытута вывучэння вайны (ISW), расейская групоўка ў Белгарадскай вобласці, адкуль уночы 10 траўня пачалося ўварванне, налічвае 30 000 чалавек, а разам з войскамі на прылеглых тэрыторыях можа дасягаць 50 000.