Міліцыянты ўлезлі праз акно ў кватэру дэмакрата, каб паслухаць, як ён лаецца мацюком

Дэмакратычны актывіст Аляксандр Атрошчанкаў прысуджаны судом Цэнтральнага раёна Менска да 10 сутак арышту. Прысуд вынесла суддзя Таццяна Паўлючук. На судзе міліцыянты сцвярджалі, што актывіста арыштавалі з прычыны… «нецэнзурнай лаянкі». Нагадаем, што 9 кастрычніка позна ўвечары ў кватэру Атрошчанкава на другім паверсе праз акно (!) улезлі міліцыянты, правялі ператрус, канфіскавалі ўсю тэхніку, інфармацыйныя матэрыялы да Еўрапейскага Марша, нацыянальную і еўрапейскую сімволіку і арыштавалі гаспадара кватэры.

Уварваўшыся ў кватэру актывіста апазіцыі, міліцыянты заявілі, што ім паступіў ананімны званок пра тое, што там знаходзіцца труп. Аднак, як толькі яны патрапілі ў кватэру, перш за ўсё яны зацікавіліся кампутарамі.

Відавочна, што ўварванне ў кватэру Аляксандра Атрошчанкава ажыццёўленае па палітычных матывах. У момант нападу міліцыянтаў Атрошчанкаў пакінуў уключаным тэлефон, і мы чулі, як міліцыянты пагражалі яму і патрабавалі паказаць інфармацыйныя матэрыялы, звязаныя з Еўрапейскім Маршам. Потым тэлефон Атрошчанкава быў адключаны…

Ператрус у кватэры апазіцыянера працягваўся тры гадзіны. У кватэру не ўпусцілі жонку Аляксандра Атрошчанкава Дар'ю. Жонцы палітыка таксама не дазволілі перадаць мужу цёплыя рэчы з сабою ў турму.

Сведкамі абвінавачвання на судовым працэсе над дэмакратам выступалі старэйшы інспектар аддзела прафілактыкі правапарадку Цэнтральнага РУУС Дзмітрый Курэльчук і інспектар аддзела прафілактыкі правапарадку Цэнтральнага РУУС Анатоль Сушчэня.