За безбілетны праезд – пад суд?

Паслугамі грамадскага транспарту карыстаюцца да 80 працэнтаў сталічных жыхароў. Пры гэтым транспартнікі лічаць, што траціна пасажыраў не плаціць за праезд. Сістэму аплаты з дапамогай кампосцера ў Міністэрстве транспарту называюць безнадзейна састарэлай. У гэтай сувязі спецыяльна створаная працоўная група прыступіла да распрацоўкі розных сістэм кантролю – аж да суду над безбілетнікамі.

Начальнік Упраўлення аўтамабільнага транспарту Міністэрства транспарту і камунікацый Вячаслаў Сікорскі лічыць, што перш чым перайсці да тэхнічнага пераабсталявання сталічных аўтобусаў, тралейбусаў і трамваяў, трэба змяняць псіхалогію людзей і арганізацыю паездак. Пры гэтым службовец спасылаецца на досвед еўрапейскіх краін, дзе прадаюцца праязныя білеты розных відаў, у залежнасці ад часу паездкі, па полюсах, а «зайцаў» караюць вялікімі штрафамі, піша «Завтра твоей страны».

На думку Вячаслава Сікорскага, найбольш пераважны нямецкі досвед барацьбы з безбілетнікамі. «Там усталяваныя вялізныя штрафы за безбілетны праезд у грамадскім транспарце і дзейнічае своеасаблівая назапашвальная сістэма. Патрапіў без квітка ў першы раз – штраф у памеры 40 еўра і паведамленне на працу. Патрапіў у другі – суд, прычым судовыя выдаткі – за кошт «зайца». У Нямеччыне безбілетны праезд прыраўнаваны да парушэння закона».

Па словах службоўцы, Міністэрства транспарту неўзабаве плануе пачаць такую ж суровую барацьбу з безбілетнікамі.