У Полацку выставілі 400 бюстаў Леніна

У Полацку напярэдадні 90-годдзя з дня Кастрычніцкай рэвалюцыі адкрылася адзіная ў Віцебскай вобласці прыватная публічная экспазіцыя "Эпоха Леніна".

Як распавёў карэспандэнту БелТА сябра Беларускага рэспубліканскага грамадскага аб'яднання калекцыянераў, уладальнік экспазіцыі Мікола Панкрат, аснову яго калекцыі складаюць бюсты, барэльефы, скульптуры правадыра сусветнага пралетарыяту Уладзіміра Ульянава-Леніна і яго рэвалюцыйных паплечнікаў – Дзяржынскага, Фрунзе, Варашылава.

Калекцыя Міколы Панкрата налічвае больш за 400 скульптурных выяў Ілліча. Тут і кананічныя бюсты, якія стаялі ў вестыбюлях адміністрацыйных будынкаў, і гіпсавыя скульптуры маленькага Валодзі Ульянава з Палацаў піянераў, і даволі рэдкія пісьмовыя прыборы з Леніным, які адпачывае. У калекцыю таксама ўвайшлі 15 помнікаў Леніну, сабраныя Міколай Панкратам у гарадах і пасёлках Беларусі.

Экспазіцыя "Эпоха Леніна" будзе адкрытая для публічнага наведвання ў выходныя і святочныя дні. Уваход бясплатны.