Чаргінец адсудзіў у журналістаў мільёны
13- 20.12.2007, 15:28
Суд Першамайскага Раёну Менску задаволіў зыск сябры “савету рэспублікі” Мікалая Чаргінца. “Новы час” павінен выплаціць Чаргінцу 50 мільёнаў рублёў. Журналіст Аляксандар Таковіч – 1 мільён рублёў.
Нагадаем, Чаргінец выказаў свае прэтэнзіі да публікацыі ў газэце “Новы час” палітычнага нарыса журналіста Аляксандра Тамковіча “Генэрал-сэнатар Мікалай Чаргінец”. Прэтэнзіі “парламентара” выклікаў цэлы шэраг момантаў публікацыі: ад згадкі пра літаратурных рабоў, да славалюбства генэрала і цягі яго да самапіяру. Таксама Чаргінца абурыла фраза пра “нізкую якасьць ягоных твораў”. Абарона адказала па кожным з пунктаў абвінавачваньня.
Аляксандар Тамковіч учора заявіў, што мае за рацыю па ўсіх пунктах. Дарэчы, абарона таксама заяўляла хадатайніцтва пра літаратурную экспэртызу нарыса Тамковіча. Аднак судзьдзя Алена Ананіч адмовіла ў просьбе, а сёння задаволіла зыск “пакрыўджанага парламентара”.
Але спачатку Чаргінец запатрабаваў у якасці маральнай кампенсацыі спагнаць з рэдакцыі 500 мільёнаў рублёў, а з Аляксандра Тамковіча 100 мільёнаў. А таксама арыштаваць рахунак прадпрыемства «Время новостей», якое выдае газету. Учора ён знізіў суму кампенсацыі да 50 і 5 мільёнаў рублёў адпаведна.
